"Layihə idarəetməsi” modulu üzrə təlimlər uğurla başa çatıb
Nazirlər Kabinetinin tapşırığı əsasında İqtisadi İslahatların Təhlili və Kommunikasiya Mərkəzi (İİTKM) tərəfindən hazırlanan "Layihə idarəetməsi” modulu üzrə təlimlər uğurla başa çatıb.
Crossmedia.az İİTKM-nə istinadən xəbər verir ki, beş gün davam edən təlimlərdə 51 dövlət qurumunun 150-yə yaxın nümayəndəsi iştirak edib.
Mərkəzin Monitorinq və qiymətləndirmə şöbəsinin əməkdaşı Gültac Əhmədzadə-Tapdıqzadə modulun funksiyaları, iş axını və hesabatlılıq imkanları barədə ətraflı məlumat verib. Təlimlərdə Strategiya və Dövlət proqramlarında nəzərdə tutulan layihələr barədə müvafiq məlumatların modula əlavə edilməsi üzrə praktiki təqdimatlar edilib, Monitorinq və qiymətləndirmə şöbəsinin əməkdaşları tərəfindən iştirakçıların sualları cavablandırılıb və irəli sürülən təkliflər ətrafında müzakirələr keçirilib.
Təlimin sonuncu günündə Naxçıvan Muxtar Respublikasının Nazirlər Kabineti, Fövqəladə Hallar Nazirliyi, Dövlət İmtahan Mərkəzi, Şuşa şəhər Dövlət Qoruğu İdarəsi, Gənclər Fondu, İpoteka və Kredit Zəmanət Fondu, Azərbaycan İnvestisiya Holdinqi, Sahibkarlar (İşəgötürənlər) Təşkilatları Milli Konfederasiyasının əməkdaşları iştirak ediblər.
Təlimlər boyunca iştirakçıların göstərdiyi maraq və fəallıq modulun aktuallığının və onun tətbiqinin uğurlu olacağının göstəricisi kimi qiymətləndirilib. "Layihə idarəetməsi” modulunun tətbiqi Strategiya və Dövlət proqramlarının icrasının monitorinqi və qiymətləndirilməsində yeni mərhələ hesab olunur. Layihələr üzrə mərkəzləşdirilmiş və real vaxt rejimində fəaliyyət göstərən bu sistem ölkəmizin inkişaf strategiyalarının effektiv və uğurlu icrasına mühüm töhfə verəcək.
15:53 20.12.2024
Oxunuş sayı: 5538
