Yanacaq doldurma məntəqəsində avtomobil alovlandı, 3 nəfər həlak oldu
Qazaxıstanın Aktöbe şəhərində ağır faciə baş verib.
Crossmedia.az bu barədə xarici mediaya əsasən xəbər verir ki, 19 iyun gecəsi Bogenbay Batır küçəsində yerləşən avtomobil qazdoldurma məntəqəsinin ərazisində avtomobil yanıb.
Yanğınsöndürənlər alovu qısa müddətdə söndürsələr də, avtomobildə olan şəxsləri xilas etmək mümkün olmayıb. Hadisə yerində üç nəfərin — qadın və iki uşağın meyiti aşkarlanıb.
Polisin məlumatına görə, hadisə zamanı daha bir nəfər ağır yanıq xəsarətləri alıb. O, şəhər multidisiplinar xəstəxanasına yerləşdirilib və reanimasiya şöbəsində həkimlərin nəzarətindədir.
Hadisədən sonra hüquq-mühafizə orqanları qazdoldurma məntəqəsinin sahibini saxlayıb. O, müvəqqəti saxlama təcridxanasına yerləşdirilib.
Faktla bağlı partlayış təhlükəli obyektlərdə təhlükəsizlik qaydalarının pozulması maddəsi ilə cinayət işi açılıb. Hadisənin səbəbləri araşdırılır və istintaqın gedişinə rəhbərlik tərəfindən nəzarət edildiyi bildirilib.
22:32 20.06.2026
Oxunuş sayı: 46
