Xarici xəbərlər
Avropada kokain istifadəsi sürətlə artır
Avropa İttifaqının Narkotiklər Agentliyinin yeni hesabatına görə, Avropada kokain istifadəsi sürətlə artmaqda davam edir.
Crossmedia.az bu barədə xarici mediaya istinadən xəbər verir.
Araşdırma şəhərlərin tullantı sularında aşkar edilən narkotik qalıqları əsasında aparılıb. Ən yüksək göstəricilər İspaniya və Belçika şəhərlərində qeydə alınıb. İspaniyanın Lleida şəhəri isə kokain izlərinin miqdarına görə Avropada ilk sırada qərarlaşıb.
Hesabatda bildirilir ki, İspaniya hazırda kokain istifadəsinin əsas mərkəzlərindən birinə çevrilib. Xüsusilə Barselona və Lleida şəhərlərində istehlakın ən kəskin artımı müşahidə olunub. Danimarka və Sloveniyada da narkotik istifadəsinin artdığı qeyd edilir.
Bununla yanaşı, əhali arasında aparılan sorğu göstərib ki, yetkin şəxslər arasında kokain istifadəsinin ən yüksək səviyyəsi Norveç və Niderlandda qeydə alınıb.
Hüquq-mühafizə orqanları problemin qarşısını almaq üçün yeni narkotik qaçaqmalçılığı marşrutlarını izləyirlər. Məlumata görə, cinayətkar qruplar aşkarlanmaqdan yayınmaq məqsədilə getdikcə daha çox kiçik limanlardan, pilotsuz uçuş aparatlarından və İspaniya ilə Portuqaliyanın ucqar sahillərinə çıxan qayıqlardan istifadə edirlər.
Bu çərçivədə “Atlantik Kokain Magistralı” kimi tanınan beynəlxalq narkotik marşrutuna qarşı genişmiqyaslı əməliyyat keçirilib. Əməliyyat nəticəsində 54 nəfər saxlanılıb, 11 ton kokain müsadirə olunub.
00:30 21.06.2026
Oxunuş sayı: 53
