ABŞ Rusiya münasibətləri daha da pisləşəcək: Yeni sanksiyalar gəlir
ABŞ Prezidenti Donald Trampın Ağ Evin Rusiya neftinə qarşı sanksiyaları yenidən gündəmə gətirməsi Vaşinqton–Moskva münasibətlərində yeni gərginlik mərhələsinin başlaya biləcəyi ilə bağlı müzakirələri artırıb. Donald Tramp qeyd edib ki, Ağ Ev Rusiya neftinə qarşı sanksiyaları bərpa etməyi planlaşdırır. Son illərdə enerji sektoru Rusiyaya qarşı tətbiq olunan iqtisadi təzyiqlərin əsas alətlərindən biri kimi çıxış edib və neft ixracına yönələn məhdudiyyətlər Moskvanın büdcə gəlirlərinə birbaşa təsir göstərən addımlar hesab olunur. Bununla yanaşı, belə qərarlar təkcə Rusiya iqtisadiyyatına deyil, qlobal enerji bazarına, neft qiymətlərinə və beynəlxalq siyasi balanslara da təsirsiz ötüşmür. Bəs münasibətlərin yenidən gərginləşməsinə səbəb nədir? Rusiya neftinə qarşı sanksiyaların bərpası Moskva üçün nə dərəcədə ciddi təzyiq vasitəsi ola bilər?
Mövzu ilə bağlı politoloq Aydın Tağıyev Crossmedia.az-a açıqlama verib:
“ABŞ və Rusiya arasında enerji bazarları üzərində təsir mübarizəsi uzun illərdir davam edir. Neft sanksiyalarının bərpası bu mübarizənin yeni mərhələsidir. Burada ABŞ-nin sanksiyaları əsasən Rusiyanın hərbi əməliyyatlarını maliyyələşdirmə imkanlarını məhdudlaşdırmaq məqsədi daşıyır. Rusiya nefti dünya bazarında mühüm paya malikdir. ABŞ bu təsiri zəiflətmək üçün sanksiyaları yenidən gündəmə gətirir”.
Politoloq əlavə edib ki, neft ixracı Rusiyanın büdcəsinin əsas gəlir mənbəyidir: "Sanksiyalar bu gəlirləri azaltmaqla Moskvanın manevr imkanlarını daraldır Rusiya Çinə, Hindistana və digər Asiya ölkələrinə yönəlməklə sanksiyaların təsirini yumşaltmağa çalışır. Bu, sanksiyaların tam effektivliyini ilk başdan məhdudlaşdıra bilər. Hesab edirəm ki, ABŞ-nin addımı həm də Avropa və Asiya bazarlarında enerji qiymətlərinə təsir göstərə bilər. Hələ ki, ABŞ-nin Rusiya neftinə qarşı sanksiyaları bərpa etməsi Moskva üçün ciddi iqtisadi təzyiq vasitəsi sayılsa da, tam nəticə verməsi Rusiyanın alternativ bazarlara çıxış imkanlarından asılıdır. Bu addım həm də ABŞ-Rusiya münasibətlərində gərginliyin artmasına, enerji bazarlarında isə yeni balans axtarışına səbəb ola bilər”.
Ayhan
12:18 17.06.2026
Oxunuş sayı: 115
