Gündəm,Xarici xəbərlər
Paşinyan: Azərbaycanla nəqliyyat əlaqələrinin açılması sülh deməkdir
Ermənistanın baş naziri Nikol Paşinyan TRIPP layihəsi çərçivəsində regionda nəqliyyat və enerji əlaqələrinin genişləndirilməsi ilə bağlı fikirlərini bölüşüb.
Crossmedia.az bu barədə xarici mediaya əsasən xəbər verir.
Paşinyan bildirib ki, layihə çərçivəsində üç istiqamətin reallaşacağına tam əmindir: dəmir yolu, avtomobil yolu və elektrik xətlərinin yaradılması.
Onun sözlərinə görə, digər istiqamətlər, o cümlədən resursların mərkəzləşdirilməsi və boru kəmərlərinin tikintisi tərəfdaş ölkələrin qərarlarından daha çox asılıdır.
Baş nazir qeyd edib ki, bu layihələrin həyata keçirilməsi regionda sülhün möhkəmlənməsinə xidmət edəcək. O vurğulayıb ki, Ermənistan və Azərbaycan vətəndaşlarının qarşılıqlı səfərləri, eləcə də qatar və nəqliyyat marşrutlarının fəaliyyətə başlaması sülhün praktik təzahürü olacaq.
Paşinyan əlavə edib ki, regionda davamlı sabitliyin təmin olunması üçün sülh sazişinin imzalanması və ratifikasiya edilməsi mühüm əhəmiyyət daşıyır. Bununla yanaşı, o, nəqliyyat-kommunikasiya əlaqələrinin bərpasını Ermənistan-Azərbaycan münasibətlərində etimadın möhkəmlənməsinə töhfə verəcək addım kimi qiymətləndirib.
17:20 11.06.2026
Oxunuş sayı: 56
