Xarici xəbərlər
Türkiyə tərəfi həmçinin bildirib ki, bu cür addımlar adadakı vəziyyəti daha da gərginləşdirə və regionda təhlükəsizlik risklərini artıra bilər.
Türkiyə Fransa–Kipr hərbi sazişinə etiraz etdi
Türkiyənin Müdafiə Nazirliyi Fransa ilə Cənubi Kipr Rum Administrasiyası arasında imzalanmış yeni hərbi status sazişini sərt şəkildə tənqid edib və sənədi beynəlxalq hüquq normalarına zidd adlandırıb.
Crossmedia.az bu barədə xarici mediaya istinadən xəbər verir.
Nazirliyin bəyanatında vurğulanıb ki, Fransa Kiprdə qarant dövlət statusuna malik deyil və buna görə də belə razılaşmalar bağlamaq səlahiyyətinə sahib deyil.
Ankara hesab edir ki, sözügedən saziş 1960-cı il Kipr razılaşmalarının ruhuna ziddir və kiprli türklərin qanuni hüquq və maraqlarını nəzərə almır.
Türkiyə tərəfi həmçinin bildirib ki, bu cür addımlar adadakı vəziyyəti daha da gərginləşdirə və regionda təhlükəsizlik risklərini artıra bilər.
Bəyanatda qeyd olunub ki, Türkiyə Şimali Kipr Türk Respublikasının təhlükəsizliyini və maraqlarını qorumaqda qətiyyətlidir. Ankara eyni zamanda regionda Türkiyənin maraqlarına qarşı yönəlmiş hərbi ittifaqların formalaşdırılmasının mənfi nəticələr doğura biləcəyi barədə xəbərdarlıq edib.
17:13 11.06.2026
Oxunuş sayı: 64
