Paşinyan rusiyalı oliqarx Karapetyanı məhkəməyə verib
Ermənistanın baş naziri Nikol Paşinyan rusiyalı erməni əsilli oliqarx Samvel Karapetyan və “Güclü Ermənistan” partiyasına qarşı məhkəmə iddiası qaldırıb.
Crossmedia.az erməni KİV-lərinə istinadən xəbər verir ki, Paşinyan hər iki cavabdehdən böhtan xarakterli məlumatların təkzib edilməsini və hər iddia üzrə təxminən 16 min ABŞ dolları məbləğində kompensasiya ödənilməsini tələb edir.
Karapetyana qarşı qaldırılan iddiaya səbəb onun mayın 25-də verdiyi müsahibədə Paşinyanın Kanadada evinin olduğunu bildirməsi olub. Ermənistan hökumət başçısı isə bu məlumatın tamamilə yalan, böhtan xarakterli və həqiqətə uyğun olmadığını bəyan edib.
İddiaya əsasən, Paşinyan məhkəmədən Karapetyanın ən azı üç KİV vasitəsilə təkzib verməsini tələb edir. Təkzibin hər biri azı 200 min abunəçisi olan “YouTube” kanallarında videomüraciət formasında və canlı yayımla səsləndirilməlidir. Müraciətdə məhkəmə qərarında göstərilən əsas mətnin oxunması da tələb olunur.
16:14 11.06.2026
Oxunuş sayı: 297
