Belarus prezidenti Paşinyanın siyasətini hədəf alıb
Belarus prezidenti Aleksandr Lukaşenko Ermənistan rəhbərliyini daxili siyasi maraqlara görə “siyasi oyunlar” aparmaqda ittiham edib.
Crossmedia.az xəbər verir ki, Lukaşenko bu açıqlamaları Astanada mayın 29-da keçirilmiş Avrasiya İqtisadi İttifaqı sammitindən sonra verib. Belarus mediası isə müsahibəni bu gün yayımlayıb.
Belarus prezidenti bildirib ki, Ermənistanda səslənən bir sıra bəyanatlar iyunun 7-nə planlaşdırılan seçkilər öncəsi daxili siyasi çəkişmələrlə bağlıdır. Onun sözlərinə görə, Ermənistan rəhbərliyi “boşuna hərəkət edir” və bu addımlar Aİİ-yə hörmətsizlik kimi qiymətləndirilə bilər.
Ermənistanın baş naziri Nikol Paşinyanın siyasətini tənqid edən Lukaşenko erməni xalqının Rusiya ilə Avropa İttifaqı arasında seçim edərkən diqqətli olmalı olduğunu bildirib. O, Ermənistanın “Ukraynanın taleyini təkrarlamaması” barədə xəbərdarlıq edib.
Lukaşenko həmçinin qeyd edib ki, Ermənistana səfər edən Avropa liderləri konkret vədlər vermir, əsasən Rusiya və Belarusu tənqid etməklə kifayətlənirlər.
Belarus lideri əlavə olaraq Nikol Paşinyanın Rusiya qazından imtina ediləcəyi təqdirdə Ermənistan üzərindən yeni tranzit marşrutu yaradılması ilə bağlı fikirlərini də şübhə altına alıb. Onun sözlərinə görə, bu cür layihələrin reallaşması ilə bağlı konkret təminatlar yoxdur.
09:57 01.06.2026
Oxunuş sayı: 73
