Süni intellekt sənət adamlarını əvəz edəcək? - Aydınlıq gətirildi
Azərbaycanın mədəniyyət naziri Adil Kərimli yerli mediaya açıqlamasında bildirib ki, süni intellekt sənət adamlarını əvəz edə bilməz. Müasir texnologiyalar nə qədər inkişaf etsə də, insan ruhunun yaratdığı sənətin təsirini tam şəkildə təkrarlamaq mümkün görünmür. Süni intellekt bir mətn yaza, bir musiqi bəstələyə, hətta obraz yarada bilər. Amma o, Afaq Bəşirqızı kimi bir baxışla tamaşaçının qəlbinə toxuna, Nəsibə Zeynalova kimi illərlə unudulmayan obrazlar yarada, Amaliya Pənahova kimi səhnəyə hökm edə, Həsənağa Turabov kimi xarakterləri ilə yaddaşlara həkk oluna bilməz. O, dünyasını dəyişmiş görkəmli sənətkarımız Rasim Balayev kimi tarixi qəhrəmanları yaşada, Fəxrəddin Manafov kimi səssiz baxışlarla hiss ötürə, Cabir İmanov kimi oynadığı rollarla insanların düşüncəsini dəyişə bilməz. Çünki sənət sadəcə texnologiya yox, yaşanmış həyatın, hisslərin və insan ruhunun səhnəyə çevrilmiş halıdır.
Xalq artisti Afaq Bəşirqızı bu barədə Crossmedia.az-a danışıb.
O, nazirinin dediyi fikir ilə razılaşdığını bildirib: "Cənab nazir tamamilə düzgün buyurub. Süni intellekt heç vaxt canlı aktyorları, sənət adamlarını tam şəkildə əvəz edə bilməz. Açığı, mən də əvvəllər süni intellektlə ilk tanış olanda bir qədər təlaşlandım. Düşündüm ki, bəlkə, gələcəkdə bir çox sahələrdə insan faktorunu arxa plana keçirəcək. Amma zaman keçdikcə gördüm ki, bunun həm gənclərə, həm yaşlılara, həm də ümumiyyətlə insanlara müəyyən mənada faydası da var. İndiki dövrdə, dünyada baş verən hadisələri, insanların gündəlik çətinliklərini nəzərə alsaq, hər kəsin çox iş görmək, hər məsələyə vaxt ayırmaq imkanı olmur. Bu baxımdan texnologiya insanlara müəyyən qədər dəstək verir".
A.Bəşirqızı hesab edir ki, bugünkü gənclər bəzən yaşlı nəslin ürəyindən tikan çıxarır: "Amma eyni zamanda gənclərin özünün də böyüklərin təcrübəsinə, həyat görmüş insanların sözünə ehtiyacı var. Çünki nə qədər texnologiya inkişaf etsə də, insanın yerini, onun hissini, düşüncəsini və həyat təcrübəsini heç nə tam əvəz edə bilmir".
İnformasiya Texnologiyaları üzrə mühəndis-tədqiqatçı Bəhruz Əliyevin sözlərinə görə isə süni intellekt bəzi sahələrdə sənət adamlarının işini asanlaşdıra bilər, amma onları tam əvəz etməsi çətin görünür, çünki sənət yalnız texniki bacarıq deyil, həm də duyğu, həyat təcrübəsi və insan hisslərinin ifadəsidir: " Musiqiçi, rəssam və ya yazıçı əsər yaradanda öz daxili hisslərini ortaya qoyur. Süni intellekt isə əsasən mövcud məlumatları analiz edib yeni kombinasiya yaradır. Yəni o, insan kimi yaşamır, hiss etmir və emosional təcrübə qazanmır. Məsələn, bir bəstəkarın yaşadığı sevinc və ya kədər musiqiyə təsir edir. Bu hisslərin tam şəkildə maşın tərəfindən təqlid olunması hələ mümkün deyil. Ancaq süni intellekt artıq mahnı bəstələyə, şəkil çəkə və hətta məqalə yaza bilir. Bu isə bəzi insanların “yaradıcılıq təhlükə altındadır” düşüncəsinə səbəb olur. Əslində isə texnologiya tarixində hər yeni alət əvvəlcə qorxu yaradıb. Fotoaparat çıxanda da insanlar rəssamlığın bitəcəyini düşünürdülər. Amma əksinə, yeni sənət kimi yeni istiqamətlər qazandı. Süni intellekt də daha çox vasitə rolunu oynaya bilər".
Mütəxəssis süni intellektin sənət sahəsinə hansı yeniliklər gətirəcəyini vurğulayıb: "Məsələn, dizayner ideya toplamaq üçün Sİ-dən istifadə edə bilər.Musiqiçi yeni ritmlər və səs effektləri yaratmaqda ondan faydalana bilər. Yazıçılar isə mətn planı hazırlamaqda süni intellektdən yardım ala bilərlər. Amma son qərarı yenə insan verir və əsərə mənanı insan qatır. İnsanlar həmişə real hiss və hekayələrə daha çox dəyər verəcəklər. Bu səbəbdən düşünürəm ki, gələcəkdə süni intellekt sənət adamlarını tam əvəz etməyəcək, sadəcə onların işləmə formasını dəyişəcək".
Fatimə
18:50 21.05.2026
Oxunuş sayı: 532
