Qərbin müdaxiləsi Azərbaycan-Ermənistan arasında sülh müqaviləsinin imzalanmasını ləngidir
Cənubi Qafqaz regionu Qərb üçün geosiyasi və enerji təhlükəsizliyi baxımından mühüm əhəmiyyət daşıyır. Regionun əsas enerji dəhlizlərinə və strateji kommunikasiya xətlərinə çıxışı, eyni zamanda böyük güclər arasında təsir dairəsi uğrunda mübarizə, bölgənin əhəmiyyətini daha da artırır. Azərbaycanın bu kontekstdəki mövqeyi isə onun xarici siyasət prioritetləri və balanslaşdırılmış yanaşmaları ilə diqqət çəkir.
Məsələ ilə bağlı politoloq Oqtay Qasımov Crossmedia.az-a açıqlaması zamanı bildirib ki, Qərbin Cənubi Qafqazdakı strateji maraqları əsasən bölgədə Rusiyanın təsirini zəiflətmək, Ermənistan üzərindən regionda möhkəmlənmək və bu yolla nəqliyyat-kommunikasiya dəhlizlərini nəzarət altına almaqla Qafqaz üzərindən Orta Asiyaya çıxış əldə etməkdir:
“Fransa bu prosesdə fəal maraq göstərir. Fransanın əsas hədəflərindən biri Qazaxıstan və Özbəkistandan uran tədarükünü təmin etməkdir. Hazırda Rusiyadan keçən Avropa istiqamətində yollar bağlı olduğu üçün bu mənbələr yalnız Cənubi Qafqaz üzərindən təmin edilə bilər”.
Politoloq eyni zamanda ABŞ-ın da bölgədə strateji məqsədlərinin mövcud olduğunu vurğulayıb:
“Vaşinqton Cənubi Qafqazda möhkəmlənməklə Rusiyanın təsirini zəiflətmək, Ermənistan vasitəsilə İrana təzyiq göstərmək və Orta Asiyaya çıxış əldə etməklə regionda mövqelərini gücləndirmək istəyir. Amerika isə bu coğrafiyada Çinə və Rusiyaya qarşı rəqabət imkanlarını artırmaqda maraqlıdır”.
Oqtay Qasımov Qərbin bölgədəki proseslərə müdaxiləsinin Cənubi Qafqazdakı güc balansına təsiri məsələsinə də toxunub:
“Bu müdaxilələr, Azərbaycan-Ermənistan arasında sülh müqaviləsinin imzalanmasını ləngidir və bölgədə tamşəkilli təhlükəsizlik arxitekturasının yaranmasına mane olur. Azərbaycanın əsas mövqeyi isə Cənubi Qafqazın sülh və əməkdaşlıq məkanına çevrilməsidir. Lakin Qərbin regiona təsirləri Azərbaycanın maraqlarına uyğun deyil. Bu müdaxilələr bölgədə vəziyyəti gərginləşdirir və ölkəyə olan investisiya marağını azaldır. Sülhün təmin olunmaması Azərbaycanın iqtisadi inkişafına da mənfi təsir göstərir”.
O, həmçinin Azərbaycanın Qərb ölkələri ilə əməkdaşlıqda maraqlı olduğunu da qeyd edib:
“Azərbaycan Avropa İttifaqı ilə sıx iqtisadi əlaqələrə malikdir. Ölkəmizin enerji resurslarının əhəmiyyətli hissəsi Avropa bazarlarında satılır və ticarət dövriyyəsinin təxminən 60%-i Qərb ölkələri ilə həyata keçirilir”.
O.Qasımov Azərbaycanın NATO və Avropa Şurası ilə əməkdaşlıq məsələsinə də toxunub:
“Bu yaxınlarda NATO nümayəndələrinin Azərbaycana səfəri zamanı qarşılıqlı maraqlar müzakirə olunub. Bununla yanaşı, Avropa İttifaqına üzv olan 10 ölkə ilə Azərbaycan arasında strateji tərəfdaşlıq və müttəfiqlik münasibətləri mövcuddur. Enerji sahəsində isə xüsusi əhəmiyyət daşıyan birgə memorandumlar imzalanıb”.
“Bu münasibətlər Azərbaycanın etibarlı tərəfdaş imicini gücləndirir və beynəlxalq nüfuzunu artırır. Azərbaycanın sabit və balanslı siyasəti ölkənin milli maraqlarına tam uyğun gəlir”, - deyə politoloq qeyd edib.
Aytac Bəhruzqızı
16:12 11.12.2024
Oxunuş sayı: 8216
