Suriya Rusiyadan Əsədin təhvil verilməsini istəyir
Suriya prezidenti Əhməd Əş-Şəra oktyabrın 15-də Moskvada Rusiya prezidenti Vladimir Putinlə görüş zamanı keçmiş lider Bəşər Əsədin Suriyaya təhvil verilməsini tələb edib.
Crossmedia.az xarici KİV-ə istinadla xəbər verir ki, bu barədə Suriya Xarici İşlər Nazirliyinin Rusiya və Şərqi Avropa departamentinin direktor müavini Əşhəd Səlibi məlumat verib.
Onun sözlərinə görə, Əş-Şəra görüşdə Suriyada ədalətin bərpası üçün son illərdə törədilən cinayətlərə və insan haqları pozuntularına görə məsul şəxslərin məhkəmə qarşısına çıxarılmasının vacibliyini vurğulayıb.
Səlibi əlavə edib ki, Rusiya tərəfi bu məsələdə Dəməşqin mövqeyini aydın şəkildə başa düşdüyünü nümayiş etdirib.
Qeyd edək ki, görüşdən əvvəl Qərb mediası da Əş-Şəranın Moskvaya səfəri zamanı Bəşər Əsədin ekstradisiyasını rəsmi şəkildə tələb etməyi planlaşdırdığını yazıb.
Fatimə Məmmədova
21:21 18.10.2025
Oxunuş sayı: 8447
