Qərb Gürcüstanda inqilab etmək istəyir - Vəziyyət gərginləşəcək

2024-cü ilin sonlarına yaxın Gürcüstanda baş verən siyasi və hüquqi dəyişikliklər, xüsusilə ABŞ və Aİ ilə münasibətlərdə ciddi gərginliklərə səbəb olub. May ayında qəbul olunan və sonra ləğv olunması tələb olunan qanunlar, həmçinin Gürcüstanın Avropa inteqrasiyasını dondurması, beynəlxalq münasibətlərdə yeni bir mərhələyə gətirib çıxarıb. Bu hadisələr, eləcə də Gürcüstanın daxili siyasətindəki böhranın, regiondakı digər ölkələrə təsirini artırıb. Həm Qərb, həm də Gürcüstan hökuməti arasında qarşılıqlı təzyiqlər və sanksiya hədələri, ölkənin gələcək siyasi mənzərəsini daha da mürəkkəbləşdirməkdə davam edir. 

Mövzu ilə bağlı Crossmedia.az-a açıqlama verən politoloq Elşad Həsənov son hadisələrin fonunda Gürcüstandakı vəziyyətdən söhbət açaraq yaranan problemlərin Azərbaycan üçün strateji əhəmiyyətinə də nəzər salıb:

"ABŞ-nin Gürcüstanla münasibətləri bu ilin may ayında Gürcüstanın Xarici Agentliklər haqqında qanun qəbul etməsi və ondan sonra Ailə dəyərlərinin və yetkinlik yaşına çatmayanların müdafiəsi haqqında qanunların ləğv olunmasını tələb etməsi ilə gərginləşdi. Bu ikinci qanun LGBT haqları ilə bağlı idi və Gürcüstan onu qəbul etdi. Bu qanunların qəbul edilməməsi və qəbul edildikdən sonra ləğv olunması tələb olundu. Bunu Gürcüstan parlamenti etmədikdən sonra ABŞ Gürcüstan ordusuna ayırdığı 90 milyon dolları may ayında dayandırdı. Noyabrın 28-də baş nazir Gürcüstanın Avropaya inteqrasiyasını 2028-ci ilə qədər dondurduqlarını bəyan edəndən sonra isə Gürcüstana qarşı təhdidlər başladı. O cümlədən ABŞ da strateji tərəfdaşlığın dayandırılması haqqında bəyanat verdi. Bu cür bəyanatlar həm də Aİ-dən gəldi. Aİ Gürcüstana ayırdığı 100 milyon avronu verməkdən imtina etdi və həmin pulu müxalifətə yönəldəcəyini bildirdi. Eyniliklə, ABŞ da bu pulu Gürcüstan müxalifətinə göndərəcəyini açıqladı. Görünür ki, ABŞ və Qərb istəklərini yerinə yetirmədikdə, Gürcüstanla təhdidlə danışmağa başladılar".

Politoloq Gürcüstana qarşı sanksiyaların artıq hazırlanmağa başlanıldığını, bunun bir fakt olduğunu qeyd edib: 

"İrakli Kobaxidzenin nikbin danışması və “biz yeni hakimiyyətlə münasibətləri strateji müttəfiqliyi, tərəfdaşlığı yenidən başlayacağıq” deməsi o qədər də inandırıcı deyil. 
Noyabrın 8-də Parisdə Gürcüstanın prezidenti, müxalifətə dəstək verən və indiki Gürcü arzusu hakimiyyətinə qarşı olan, Avropa inteqrasiyasını dəstəkləyən Salome Zurabişvili Noterdam kilsəsinin açılışında iştirak etdi. Orada həm prezident Makronla, həm ABŞ-ın yeni seçilən prezidenti Trampla, həm də Ukraynanın prezidenti Zelenskilə görüş keçirdi və həmçinin İtaliyanın baş naziri Meloni ilə də görüşlər təşkil etdi. Təbii ki, o, orada Gürcüstanda baş verən hadisələri onların nəzərinə çatdırdı və onlardan da dəstək istədi. Hazırki dövrdə hər üç Baltik ölkəsi Gürcüstana sanksiya tətbiq edib. İndi isə həm ABŞ, həm də Aİ Gürcüstana sanksiyalar hazırlayır. Bu barədə Ağ Evin sözçüsü məlumat verib". 

Ekspert Qərbin Gürcüstan üzərindəki gələcək planlarından da danışıb:

"Biz istəyərdik ki, Gürcüstanda vəziyyət sabitləşsin. Lakin Qərb Gürcüstanda rəngli inqilab etmək, Gürcüstan əhalisinin çoxluğunun səs verdiyi Gürcü arzusu partiyasını devirmək istəyir. Bu yöndə də iş aparırlar. Ayın 28-dən başlayan etiraz aksiyaları davam edir. Hesab edirəm ki, hələ qarşıda daha gərgin günlər olacaq. Çünki dekabrın 14-də Gürcüstanda prezident seçkiləri keçiriləcək. Gürcü arzusu partiyasının irəli sürdüyü Mixail Kavelaşvili prezident seçiləcək. Dekabrın 16-da isə Aİ xarici işlər nazirləri görüşüb Gürcüstanla bağlı məsələləri müzakirə edəcək, ona sanksiyalar tətbiq edəcəklər. Bundan sonra isə, hələlik özünü legitim vəzifə sahibi sayan Salome Zurabişvili, İrakli Kobaxidzenin dediyi kimi, dekabrın 29-da yeni seçilən prezidentin and içmə mərasimindən sonra öz iqamətgahını tərk etmək məcburiyyətində qalacaq. Bütün bunlar hamısı da vəziyyətin gərginləşməsinə səbəb olacaq. Hesab edirəm ki, Gürcüstan müxalifəti ilə indiki Gürcü arzusu partiyası arasında danışıqlar aparılmalıdır. Gürcü xalqı bir-birinə qarşı olmamalıdır. Konsensusa gəlməlidirlər və Gürcüstandakı bu qarşıdurmanı dayandırmalıdırlar". 

E.Həsənov sonda Gürcüstanda olan qarışıqlıqların regiona da, Azərbaycan və Ermənistana da ciddi təsir etdiyini, ona görə də Azərbaycan olaraq Gürcüstanda sabitlik, sakitlik olmasını və strateji müttəfiqliyimiz davam etməsini istədiyimizi vurğulayıb.

Banuçiçək Kalbalıyeva