Tramp administrasiyası hazırda ikitərəfli çarpaz təzyiqlər altındadır - O, nə edəcək?
Yaxın Şərqdə gərginlik getdikcə yeni mərhələyə daxil olur. Region ölkələri arasında münaqişələr intensiv xarakter alıb. İranın xarici işlər naziri Abbas Əraqçi açıqlayıb ki, Tehran ABŞ və İsrailə heç bir halda atəşkəs üçün müraciət etməyib və ölkə müqavimət strategiyasını davam etdirir. Nazir bildirib ki, müharibə yalnız elə nəticələrlə bitməlidir ki, düşmənlər bir daha İrana təcavüz etmək cəhdinə əl atmasınlar. Bu açıqlama İranın mövqeyini və regiondakı təhlükəsizlik siyasətini bir daha ön plana çıxarır.
Mövzu ilə bağlı Crossmedia.az-a politoloq Elçin Xalidbəyli bildirib ki, Yaxın Şərq bölgəsi ətrafında olduqca qəliz bir situasiya yaranıb: "Hətta hesab etmək olar ki, Yaxın Şərqdə proseslər artıq tədricən ABŞ–İsrail tandeminin nəzarətindən çıxmaq üzrədir. Burada belə anlaşılıq var ki, yeni situasiyada qarşıduran tərəflərin mövqeləri ciddi şəkildə dəyişib. Əgər savaşdan öncə şərtləri diqtə edən tərəf ABŞ idi, indi savaşın başlanmasından sonrakı mərhələdə elə bir vəziyyət yaranıb ki, İran şərtləri irəli sürən tərəfə çevrilməyə başlayıb. Yəni artıq siyasi-diplomatik masada bir deyil, iki tərəf tələbləri irəli sürən, şərtləri diqtə edən tərəf var”.
O, əlavə edib ki, ABŞ savaşdan öncə müharibənin başlanmaması üçün İrandan nüvə proqramının ləğvini tələb edirdi: "İran bunu qəbul eləmədi və savaş başladı. İndi İran müharibənin dayandırılması üçün ABŞ-dən, Amerikanın İrana bundan sonra heç vaxt hərbi müdaxilə etməyəcəyinə təminat verilməsini tələb edir. Yəni indi, əgər savaşın dayandırılmasını istəyirsə, ABŞ İrannın tələbinə həssas yanaşmaq məcburiyyətində qala bilər. Ancaq Tramp administrasiyası bu tələbi qəbul etmir, ona görə də hesab etmək olar ki, münaqişə tərəfləri arasında yaxın vaxtlarda razılaşma və ya atəşkəslə bağlı anlaşma ehtimalı o qədər də yüksək deyil. Böyük ehtimalla bu savaş hələ bir müddət davam edə bilər”.
Politoloq vurğulayıb ki, situasiyanın nəzarətdən çıxması eyni zamanda ABŞ-nin Yaxın Şərqdə savaş bataqlığına düşməsi Tramp administrasiyasının vəziyyətini ciddi şəkildə ağırlaşdırıb: "Xüsusilə Tramp administrasiyası artıq ABŞ daxilində gedən proseslərlə bağlı da ciddi təzyiqlərlə üzləşir. Şünki ABŞ-nin savaş xərcləri sürətlə artır. Bu da ölkə daxilində ictimai narazılıq doğurur və bunun qarşılığı olaraq Tramp administrasiyasına təzyiqlər artır. Tramp administrasiyası hazırda ikitərəfli çarpaz təzyiqlər altındadır: bir tərəfdən İranın savaşı dayandırmaq üçün irəli sürdüyü tələblərlə bağlı müəyyən addımların atılması vacibdir, digər tərəfdən ABŞ daxilində situasiyanın nəzarətdə saxlanılması, təzyiqlərə müqavimət göstərilməsi ehtiyacı yaranıb. Bu baxımdan hesab etmək olar ki, savaş bir müddət davam edə bilər”.
O, əlavə edib ki, İrana qarşı daha dağıdıcı zərbələrin endirilmə ehtimalı mövcuddur: "Yəni əgər ABŞ bu savaşı İranla anlaşmadan yekunlaşdırmaq niyyətində israrlı olarsa, bu, o deməkdir ki, ABŞ savaşın uzanmaması üçün yaxın vaxtlarda İrana qarşı daha dağıdıcı zərbələr endirmək məcburiyyətində qala bilər”.
Mehriban Yariyeva
15:56 18.03.2026
Oxunuş sayı: 63
