Diaspor

Azərbaycan və Türkiyə məktəbliləri ÇANAQQALADA

Naxçıvan Muxtar Respublikasının ümumtəhsil məktəblərinin 14 şagirdi “Qardaşlıq və tarix: Çanaqqala görüşü” layihəsi çərçivəsində Türkiyənin Çanaqqala şəhərinə səfər edib.

Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.

İğdır Azərbaycan Dil, Tarix və Mədəniyyət Birliyi Yaşatma və Dəstəkləmə Dərnəyinin, İğdır Azərbaycan Evinin, İğdır Valiliyinin təşkilatçılığı, Türkiyənin Daxili İşlər Nazirliyinin dəstəyi ilə dekabrın 1-dən 5-ə kimi Naxçıvan Muxtar Respublikasının ümumtəhsil məktəblərinin 14 şagirdi iğdırlı məktəblilərlə birlikdə Çanaqqala şəhərində bir neçə proqrama qatılıb. Orada yerləşən Troya antik şəhərini, “Çimenlik” qalasını, Şəhidlər xiyabanlarını, 1915-ci il Çanaqqala döyüşlərində şəhid olan Azərbaycan əsgərlərinin xatirəsinə ucaldılmış abidəni və digər yerləri ziyarət ediblər.

Məktəblilər əvvəlcə İğdır Azərbaycan Evində olublar. İğdır Azərbaycan Evinin rəhbəri Ziya Zakir Acar Azərbaycan Evinin 2021-ci ildə rəsmi açılış mərasiminin keçirilməsi ilə fəaliyyətə başladığını qeyd edib. Diasporla İş üzrə Dövlət Komitəsinin dəstəyi və təşəbbüsü ilə yaradılan İğdır Azərbaycan Evində Türkiyə və Azərbaycanın milli və dövlət bayramlarının, əlamətdar günlərinin qeyd olunduğunu, müxtəlif dərnəklərin fəaliyyət göstərdiyini diqqətə çatdırıb. Şərqi Anadoluda etnik azərbaycanlıların milli özünəməxsusluğunu qoruyub saxlaması istiqamətində bir çox mədəni və digər məzmunlu tədbirlərin keçirildiyini vurğulayıb.

“18 mart 1915-ci ildə Çanaqqala döyüşündə türk, müsəlman və vətən uğrunda canından keçən 253 min mehmetçiklə bərabər 3 mindən çox Azərbaycan əsgəri şəhid olub. Bu savaşda azərbaycanlıların duyğu və mənəvi bütövlüyü həmrəylik ruhu baxımından son dərəcə əhəmiyyətlidir” - deyə Ziya Zakir Acar qeyd edib.

Qeyd edək ki, layihə Naxçıvan Muxtar Respublikasının 100 illik yubileyi tədbirləri çərçivəsində həyata keçirilib.