MEK-də Xocalı soyqırımına həsr olunmuş sərgi keçirilir
Bu gün Xocalı soyqırımının törədilməsindən 34 il ötür. Dünya tarixində dinc əhaliyə qarşı törədilmiş ən ağır kütləvi qırğınlardan biri kimi dərin iz buraxmış bu faciənin anılması, həqiqətlərinin beynəlxalq ictimaiyyətə çatdırılması və yaddaşlarda yaşadılması məqsədilə AMEA Mərkəzi Elmi Kitabxanasında kitab sərgisi təşkil olunub. Sərgidə Xocalı həqiqətlərini əks etdirən çoxsaylı nəşrlər nümayiş etdirilir. Onların sırasında “Xocalı şahidləri danışır”, “Xocalı şəhidləri 613”, “Xocalı soyqırımı. 1992” (üç dildə), “Xocalı. XX əsrin soyqırımı”, “Azərbaycan faciələrinin təqvimi”, “Mələklərin soyqırımı”, “Müharibə uşaqları”, “Xocalı yaddaşı”, “Xocalı soyqırımı: səbəbləri, nəticələri və beynəlxalq aləmdə tanınması”, “Qatil”, “Onları Vətəndən məhrum ediblər”, “Xocalı soyqırımı rabitəçilərin yaddaşında” və digər nəşrlər yer alır. Təqdim olunan ədəbiyyatda şəhəri müdafiə edən sakinlərin göstərdiyi qəhrəmanlıq nümunələri, faciənin canlı şahidlərinin xatirələri, həmçinin Azərbaycan dövlətinin Xocalı həqiqətlərinin dünya ictimaiyyətinə çatdırılması və bu hadisənin soyqırımı kimi tanınması istiqamətində apardığı ardıcıl və sistemli fəaliyyət geniş şəkildə əksini tapıb. Eyni zamanda, Azərbaycanın ərazi bütövlüyü və suverenliyinə, eləcə də xalqımıza qarşı törədilmiş insanlıq əleyhinə cinayətin səbəbləri və nəticələri barədə ətraflı məlumat verilir. Qeyd edək ki, sərgidə nümayiş olunan nəşrlərin həm çap, həm də elektron variantı ilə tanış olmaq mümkündür. Sərgi iki həftə müddətində davam edəcək.
11:10 26.02.2026
Oxunuş sayı: 443
