Suriyada vəziyyət gərginləşir: İran hansı addım atacaq?
İran Prezidenti Məsud Pezeşkian suriyalı həmkarı Bəşər Əsədlə telefon danışığı zamanı deyib ki, ölkəsi Suriyanın suverenliyini və ərazi bütövlüyünü qorumağa sadiqdir. O, İranın Suriyaya sarsılmaz dəstəyini vurğulayıb.
İran lideri söyləyib ki, ölkəsi böhranın həlli istiqamətində Suriyaya kömək etməyə hazırdır. O, həmçinin İranın Suriyadakı hadisələri fəal şəkildə izlədiyini diqqətə çatdırıb.
Suriya Prezidenti isə İranın davamlı dəstəyini yüksək qiymətləndirdiyini söyləyib.
Məlum olduğu kimi, Suriyada vəziyyət kifayət qədər gərgindir. Son məlumata görə, Əsəd daxildəki proseslərlə bağlı olaraq Türkiyə ilə təmaslar axtarmağa başlayıb.
Bundan əvvəl isə Əsədin təcili Rusiyaya səfər etdiyi barədə məlumat yayılmışdı.
Görünən odur ki, Əsəd mövcud durumdan narahatdır.
Suriyadakı hadisələr Yaxın Şərqdəki gərginliyi daha da artırdı. HƏMAS və “Hizbullah”ın İsraillə müharibəyə çəkilməsindən sonra bu, üçüncü dalğa kimi də qəbul oluna bilər.
Proseslərin bundan sonra necə inkişaf edəcəyi xeyli dərəcədə Rusiya- Türkiyə münasibətlərindən asılıdır. Əgər tərəflər razılığa gələ bilərlərsə, ölkədə yaxın vaxtda “sular durular”. Əks halda isə gərginlik artan templə davam edəcək. Və bu, Ankara- Moskva ikitərəfli münasibətlərinə təsir edəcək.
Suriyadakı proseslərin sonunda Əsədin tamamilə hakimiyyətdən getməsi istisna deyil. Hərçənd dediyimiz kimi, bu, xeyli dərəcədə Rusiya ilə Türkiyə arasında mümkün ikitərəfli razılaşmanın nəticəsindən asılı olacaq.
İranın proseslərdəki roluna gəldiksə isə bildirməliyik ki, Tehran indiki situasiyada böyük ehtimalla mümkün qədər təmkinli davranmağa çalışacaq. İran hazırda “ağrımayan başına dəsmal sarımaq istəməz”.
Suriyadakı proseslərə birbaşa müdaxilə İran üçün ağır nəticələrlə yadda qala bilər.
Bundan başqa, Tehranın hansısa konkret mövqeyi perspektivdə Ankara və ya Moskva ilə münasibətlərin pisləşməsi ilə nəticələnə bilər. Bu baxımdan Pezaşkian, yəqin ki, dediyindən fərqli olaraq Suriyaya kömək etmək üçün tələsməyəcək.
İran konkret addım atmaq üçün, yəqin ki, hələ proseslərin inkişafını gözləyəcək.
Kənan Novruzov
08:08 03.12.2024
Oxunuş sayı: 20558
