Özbək jurnalist Solovyovu sərt tənqid etdi: Rusiya Mərkəzi Asiyanı müstəmləkə kimi görür
Özbək jurnalist və bloger Nikita Makarenko rusiyalı təbliğatçı Vladimir Solovyovun “beynəlxalq hüquqa məhəl qoymamağı” və “Mərkəzi Asiyada birgə hərbi əməliyyat keçirmə imkanını nəzərdən keçirməyi” təklif edən bəyanatlarına kəskin reaksiya verib.
Crossmedia.az bu barədə xarici mediaya istinadən xəbər verir.
Makarenkonun sözlərinə görə, dünyanın heç bir ölkəsində dövlət mediasının əməkdaşları özlərinin və ya qonşu ölkələrin suverenliyini inkar edən fikirləri açıq şəkildə ifadə etməyə imkan vermirlər. Onun fikrincə, Rusiya istisnadır. Bununla belə, jurnalist vurğulayır ki, Solovyov şəxsi mövqe ifadə etmir, daha çox ona çatdırmaq tapşırılan mesajları çatdırır.
Makarenko qeyd edib ki, “ortaq keçmiş”, “xalqlar dostluğu”, “şanlı SSRİ” və “ümumi qələbə” söhbəti sadəcə olaraq, arxasında neokolonial siyasətin gizləndiyi pərdədir.
Onun sözlərinə görə, Moskva Mərkəzi Asiya ölkələrinə bərabərhüquqlu tərəfdaş və ya müttəfiq kimi baxmır, daha çox onlara yalnız xammal və müstəmləkə bazası kimi baxır.
O, həmçinin Rusiyanın dövlət təsiri ilə bağlı təşkilat və strukturların, o cümlədən “Rusiya Evi”, təbliğat mediası və onları dəstəkləyən “beşinci kolon” adlanan qurumların fəaliyyətinin diqqətlə araşdırılmasına çağırıb. Makarenkonun sözlərinə görə, bu strukturlar Özbəkistandakı rusdilli azlığın maraqlarını təmsil etmir, imperialist siyasətin maraqlarına xidmət edir.
Jurnalist vurğulayıb ki, Özbəkistanın rusdilli vətəndaşları sülhsevər, suveren dövlət ideyası ətrafında birləşməli, “müstəmləkəçi ağalar” olmadan müstəqil həyat qurmalı və öz evlərini müdafiə etməlidirlər.
Kübra Musayeva
16:34 12.01.2026
Oxunuş sayı: 1907
