Diaspor

Macarıstan Azərbaycan Evində Həmrəylik Günü qeyd olunub

Macarıstanın paytaxtı Budapeştdə yerləşən Azərbaycan Evində 31 Dekabr – Dünya Azərbaycanlılarının Həmrəyliyi Günü və Yeni il münasibətilə tədbir keçirilib. Azərbaycan Evinin dəstəyi və “Azərbaycan–Macarıstan Məzunlar Birliyi”nin təşkilatçılığı ilə baş tutan tədbirdə Budapeştdə yaşayan soydaşlarımız bir araya gəliblər.

Crossmedia.az bu barədə Diasporla İş Üzrə Dövlət Komitəsinə istinadən xəbər verir.

Tədbirdə Azərbaycan Evinin rəhbəri İbrahim Səfərli və “Azərbaycan–Macarıstan Məzunlar Birliyi”nin həmtəsisçisi Günay Bayramova Dünya Azərbaycanlılarının Həmrəyliyi Günü və qarşıdan gələn Yeni il münasibətilə soydaşlarımızı təbrik ediblər.

Çıxışlarda diaspor fəaliyyətində birliyin, həmrəyliyin və birgə təşəbbüslərin əhəmiyyəti xüsusi vurğulanıb. Ümummilli lider Heydər Əliyevin təşəbbüsü ilə təsis edilən Dünya Azərbaycanlılarının Həmrəyliyi Gününün bu gün dünyanın 70-dən çox ölkəsində geniş şəkildə qeyd olunduğu diqqətə çatdırılıb.

Tədbir Azərbaycanın milli rəqsləri, musiqiləri və səmimi bayram ovqatı ilə davam edib.