Berlində Həmrəylik Günü münasibətilə tədbir keçirilib
Almaniyanın paytaxtı Berlin şəhərində yerləşən “Xarı Bülbül” Azərbaycan Mədəniyyət Evi 31 Dekabr - Dünya Azərbaycanlılarının Həmrəyliyi Günü və Yeni il münasibətilə tədbir keçirib.
Crossmedia.az bu barədə Diasporla İş Üzrə Dövlət Komitəsinə istinadən xəbər verir.
Bayram tədbirində Azərbaycan Mədəniyyət Evinin 150-dən artıq üzvü və yerli ictimaiyyətin nümayəndələri iştirak edib.
Azərbaycan Evinin rəhbəri Sevda Badaliouri əlamətdar bayramlar münasibətilə tədbir iştirakçılarını və dünyanın müxtəlif ölkələrində yaşayan soydaşlarımızı təbrik edib. O, Dünya Azərbaycanlılarının Həmrəyliyi Gününün yaranma tarixinə toxunaraq, bu günün milli kimliyimizin qorunması, diasporumuzun əlaqələrinin gücləndirilməsi və xalqımızın ortaq dəyərlər ətrafında sıx birləşməsi baxımından xüsusi əhəmiyyət daşıdığını vurğulayıb.
Tədbirin bədii hissəsində “Xarı Bülbül” Azərbaycan Mədəniyyət Evinin nəzdindəki “Ritm” rəqs qrupunun çıxışları böyük maraqla izlənilib. Azərbaycan Evində fəaliyyət göstərən həftəsonu məktəbinin şagirdlərinin ifasında səslənən milli musiqilərimiz alqışlarla qarşılanıb.
16:26 30.12.2025
Oxunuş sayı: 1323
