Diaspor

Kanadadakı soydaşlarımız beynəlxalq tədbirdə iştirak edib

Kanadanın paytaxtı Ottavada “Multikultural Beynəlxalq Qadınlar Günü – 2025” adlı beynəlxalq tədbir keçirilib. Tədbir Kanada Parlamentinin üzvü Brus Fəncoy (Bruce Fanjoy) və “National Leader Multicultural Event” komandasının birgə təşkilatçılığı ilə baş tutub.

Crossmedia.az bu barədə Diasporla İş Üzrə Dövlət Komitəsinə istinadən xəbər verir.

Tarixi “Sir John A.Macdonald” binasında təşkil olunan mərasimdə 40 ölkədən 500-dən çox qonaq bir araya gəlib. Tədbirdə Kanada Azərbaycan Evinin, “Vətən” Azərbaycan İncəsənət və Mədəniyyət Mərkəzinin rəhbəri Lalin Həsənova, Azərbaycan Respublikasının Kanadadakı Müvəqqəti İşlər Vəkili Vüsal Süleymanov və Ottavada yaşayan Azərbaycan icmasının üzvləri də iştirak ediblər.

Proqram çərçivəsində qadınların multikultural cəmiyyətlərin inkişafında oynadığı rol, eləcə də müxtəlif mədəniyyətlər arasında əməkdaşlığın gücləndirilməsinə verdikləri töhfələr geniş şəkildə müzakirə olunub.

Tədbirdə Azərbaycan Evinin rəhbəri Lalin Həsənova Kanadada multikultural dəyərlərin təbliğində göstərdiyi fəallığa görə mükafata layiq görülüb.