Şimali Kaliforniyada milli musiqilərimiz səsləndirilib
ABŞ-nin Kaliforniya ştatının San Xose şəhərində 31 Dekabr – Dünya Azərbaycanlılarının Həmrəyliyi Günü münasibətilə tədbir keçirilib. Şimali Kaliforniya Azərbaycan Mədəniyyət Cəmiyyətinin təşkilatçılığı ilə baş tutan tədbirdə ABŞ-də yaşayan Azərbaycan icmasının üzvləri, mədəniyyət xadimləri və yerli ictimaiyyətin nümayəndələri iştirak ediblər.
Crossmedia.az bu barədə Diasporla İş Üzrə Dövlət Komitəsinə istinadən xəbər verir.
Şimali Kaliforniya Azərbaycan Mədəniyyət Cəmiyyətinin rəhbəri Nurlan Şükürlü çıxışında Dünya Azərbaycanlılarının Həmrəylik Gününün tarixi əhəmiyyətindən bəhs edib.
Tədbirdə, həmçinin ilin ən uzun gecəsi olan Böyük Çillənin fəlsəfəsindən danışılıb. Bu qədim adətin insanın qışa, soyuğa və qaranlığa qarşı mübarizəsini, işığın qaranlıq üzərində qələbəsini təmsil etdiyi bildirilib.
Proqramın bədii hissəsi milli musiqi və rəqslərlə davam edib. Şimali Kaliforniya Azərbaycan Mədəniyyət Cəmiyyətinin könüllüsü Anar Allahverdiyevin rəhbərliyi ilə “Sound of Fire” qrupunun səsləndirdiyi “Çoban” və “Qaytağı” oyun havaları tədbirə xüsusi rəng qatıb. Xoreoqraf Rozi Alməmmədovanın rəhbərliyi ilə “Gənclər Ansamblı” (Azerbaijan Youth Ensemble) “Uzun Dərə” rəqsini yüksək peşəkarlıqla ifa edib. Musiqiçi Aydın Şaterian və onun tələbələri isə tarda müxtəlif milli mahnılarımızı səsləndiriblər. Bütün çıxışlar iştirakçıların alqışları ilə qarşılanıb.
Tədbirin təşkilində göstərdikləri fəallığa görə cəmiyyətin üzvləri Həmid Azəri, Anar Allahverdov, Musa Güntekin və Elçin Məmmədova xüsusi təşəkkür edilib.
16:32 26.12.2025
Oxunuş sayı: 5164
