İranda islahatçılar: Pezeşkianın impiçmentlə hədələnməsi görünməyən addımdır
İranda parlamentin prezident Məsud Pezeşkianı impiçmentlə hədələməsinə islahatçı qüvvələrdən sərt reaksiya gəlib.
Crossmedia.az xarici KİV-ə istinadən xəbər verir. Ölkənin nüfuzlu islahatçı partiyalarından olan “Milli Etimad” Partiyasının sədr müavini İsmayıl Gerami Müqəddəm bu addımı İran siyasi təcrübəsində görünməmiş hal kimi dəyərləndirib.
Onun sözlərinə görə, parlamentdəki məhdud bir azlığın impiçment tələbi əsasında hökumət və prezidentin təhdid edilməsi indiyədək müşahidə olunmayıb. Gerami Müqəddəm qeyd edib ki, əvvəlki dövrlərdə heç bir hakimiyyət qolunun rəhbəri hökumətə qarşı bu cür davranış sərgiləməyib.
Siyasətçi vurğulayıb ki, prezident Pezeşkian dəfələrlə ölkədə mövcud problemlər barədə xəbərdarlıq edib və əgər problemlərin həlli Nazirlər Kabinetində dəyişiklik tələb edərsə, müvafiq addımlar atılacaq.
Eyni zamanda, islahatçı düşərgədən prezidentə ünvanlanan tənqidlər də səsləndirilib. “İslahat Cəbhəsi”nin sədri Azər Mənsuri “X” hesabında paylaşım edərək ölkədə davam edən inflyasiyanın əhalinin həyatını iflic etdiyini bildirib.
Mənsuri qeyd edib ki, süfrələr getdikcə kiçilir, psixoloji təhlükəsizlik zəifləyir və gələcəklə bağlı narahatlıq artır. Onun sözlərinə görə, sanksiyalarla yanaşı, yanlış siyasət və büdcə kəsiri xalqın ümid və etimadını sarsıdıb. “Xalq qəzəblidir, bu cür idarəçilik davam edə bilməz”, - deyə o vurğulayıb.
Türkan Kərimli
19:56 23.12.2025
Oxunuş sayı: 981
