Binance Hizbullah və husilərlə əlaqəli şəbəkələrə vəsait axınına imkan verib
Dünyanın ən böyük kriptovalyuta birjası Binance şübhəli hesablar vasitəsilə Hizbullah və Yəməndəki husilərlə əlaqəli şəbəkələrdən milyonlarla dolların köçürülməsinə icazə verib.
Crossmedia.az Financial Times qəzetinə istinadən xəbər verir. Nəşrin Binance-in daxili sənədlərinə əsaslanan araşdırmasına görə, 2021-ci ildən bu yana ümumi həcmi 1,7 milyard dollar olan əməliyyatlarda istifadə edilən 13 hesab müəyyən edilib. Bu məbləğin 144 milyon dolları Binance-in 2023-cü ilin noyabrında ABŞ hakimiyyəti ilə əldə etdiyi razılaşmadan sonra həyata keçirilib.
Qeyd olunub ki, sözügedən razılaşma çərçivəsində Binance çirkli pulların yuyulması və terrorizmin maliyyələşdirilməsi ilə bağlı pozuntulara görə 4,3 milyard dollar cərimə ödəyib. FT yazır ki, həmin hesablara daxil olan vəsaitlər ABŞ rəsmilərinin Hizbullah, husilər və Bəşar Əsəd rejimi ilə əlaqəli bir şirkətə pul köçürən şəbəkələrlə əlaqələndirdiyi kripto cüzdanlardan göndərilib.
Türkan Kərimli
19:51 23.12.2025
Oxunuş sayı: 1205
