Xarici xəbərlər

Tehran Hizbullaha illik maliyyə dəstəyini davam etdirəcək

İranın Hizbullaha illik maliyyə yardımının təxminən 1 milyard dollar səviyyəsində saxlanılmasına razılaşdığı bildirilir.

Crossmedia.az xarici KİV-ə istinadən xəbər verir. İsrailin “Kan” telekanalının Ərəb dünyası üzrə müxbiri Roy Kayesin sözlərinə görə, SEPAH-ın Qüds qanadının komandanları ilə aparılan son danışıqlarda Hizbullah tərəfi Tehrandan maliyyə dəstəyinin 2 milyard dollara qədər artırılmasını tələb edib. Lakin İran əsas müttəfiq qruplaşmaya yalnız təxminən 1 milyard dollar ayırmağa razılıq verib.

Kayes qeyd edib ki, İranın maliyyə yardımı müntəzəm xarakter daşısa da, Hizbullah rəhbərliyi bu məbləğin qrupun hərbi potensialının tam bərpası üçün kifayət etmədiyini düşünür. Bildirilir ki, son bir il ərzində Tehran müharibədən sonrakı bərpa məqsədilə Hizbullaha yüz milyonlarla dollar vəsait köçürüb.

Türkan Kərimli

🖨 Çap et

19:40 23.12.2025

Oxunuş sayı: 922