Maduro üçün geri sayım başlayıb: Vaxt əleyhinə işləyir...
Venesuela ABŞ ilə artan gərginlik fonunda BMT Təhlükəsizlik Şurasının təcili iclasının çağırılmasını istəyib. Rəsmi Karakas Vaşinqtonu aqressiv addımlarda ittiham edir və Karib dənizindəki vəziyyətin beynəlxalq səviyyədə müzakirəsini tələb edir. Bu addım Venesuelanın beynəlxalq diqqəti üzərinə çəkmək və ABŞ-la qarşıdurmada diplomatik təzyiqi artırmaq cəhdi kimi görünür. BMT Təhlükəsizlik Şurasında məsələ qaldırılması gərginliyin açıq müstəvidə müzakirəsinə imkan yaratsa da, real nəticələrin əldə olunması böyük güclərin mövqeyindən asılı olacaq.
Proseslərin gedişi ilə bağlı Crossmedia.az-a danışan politoloq Zaur Məmmədov deyib ki, Venesuelada hakimiyyətin taleyi artıq geosiyasi bazarlığın bir hissəsinə çevrilib və bu proses gec-tez ölkədə siyasi dəyişikliklərlə nəticələnəcək: "Venesuelada hakimiyyətin, Moldovada olduğu kimi, gec-tez yıxılacağına artıq şübhə yoxdur. Aydın məsələdir ki, bu gün yeni onillikləri hədəf alan geosiyasi proseslərə start verilib və bu proseslərdə yenilənmə mütləq şəkildə baş verməlidir. Venesuela məsələsinə də məhz bu aspektdən baxmalıyıq. Belə ki, Latın Amerikası ölkələrinin tədricən ABŞ-yə yaxınlaşması Donald Tramp üçün prioritet istiqamətlərdən biridir. Bilirik ki, Panama, Venesuela və Latın Amerikasının bir çox ölkəsində bununla bağlı ciddi problemlər mövcuddur. Çağırışlar fonunda Braziliya, Panama, Venesuela, Boliviya və Kuba kimi ölkələr ABŞ-nin hazırkı hakimiyyəti tərəfindən hədəf olaraq müəyyənləşdirilib ki, bu və ya digər formada onlarla yeni münasibətlərə start verilsin".
"Nəticə etibarilə, biz ABŞ ilə Rusiya arasında Ukrayna və Venesuela üzərindən aparılan bir növ bazarlığın şahidi oluruq. Təxminən eyni dövrdə həm Ukrayna, həm də Venesuela hakimiyyətinə təzyiqlər göstərildi və bu təzyiqlər fonunda Ukrayna məsələsində ABŞ-ın, Venesuela məsələsində isə Rusiyanın səssiz mövqe nümayiş etdirdiyini gördük. Lakin Rusiya–Ukrayna münaqişəsi həll olunmadığı üçün Venesuela məsələsi də uzanır. Bununla belə, bu prosesin də müəyyən vaxtı var və həmin vaxtdan sonra Venesuela məsələsi də öz həllini tapacaq", - müsahibimi əlavə edib.
Ülvi Zahidov
12:25 18.12.2025
Oxunuş sayı: 1320
