Belqorodda Ukrayna dron hücumları: 1 nəfər ölüb, 10 nəfər yaralanıb
Belqorod vilayətində Ukraynaya məxsus pilotsuz uçuş aparatlarının hücumları nəticəsində bir nəfər həlak olub, 10 nəfər yaralanıb. Bu barədə dekabrın 17-də vilayətin qubernatoru Vyaçeslav Qladkov məlumat verib.
Crossmedia.az xəbər verir ki, onun sözlərinə görə, Qraivoron rayonunun Zamostye kəndində FPV tipli dron hərəkətdə olan avtomobili vurub. Hücum nəticəsində bir kişi aldığı xəsarətlərdən hadisə yerində ölüb. Avtomobildə olan daha iki nəfər barotravma diaqnozu ilə xəstəxanaya çatdırılıb, tibbi yardım göstərildikdən sonra ambulator müalicəyə buraxılıblar. Partlayış nəticəsində nəqliyyat vasitəsi və üç fərdi evin pəncərələri zədələnib.
Zamostye kəndində baş verən digər hücumda FPV dronu evli cütlüyün olduğu avtomobilə zərər vurub. Kişi barotravma, qadın isə diz nahiyəsindən zədə, sıyrılma və barotravma alıb. Onların vəziyyəti stabil qiymətləndirilir.
Qraivoron şəhərində isə yolda FPV dronunun partlaması nəticəsində bir yeniyetmə də daxil olmaqla altı nəfər yaralanıb. 15 yaşlı qız və üç yetkin şəxs Belqorodda xəstəxanaya yerləşdirilib, digər zərərçəkənlərə yerində tibbi yardım göstərilib. Hücum zamanı üç çoxmənzilli binada yeddi mənzilin və bir kommunal binanın pəncərələri zədələnib.
Səriyyə Tağıyeva
21:08 17.12.2025
Oxunuş sayı: 877
