Gürcüstan Parlamenti Antikorrupsiya Bürosunun ləğvi haqqında qanun qəbul edib
Qanun layihəsi hakim “Gürcü Arzusu” partiyasının təşəbbüsü ilə parlamentin plenar iclasında səsə qoyularaq qəbul olunub. Sənədə əsasən, indiyədək korrupsiya ilə mübarizə və vəzifəli şəxslərin fəaliyyətinə nəzarət funksiyalarını həyata keçirən Antikorrupsiya Bürosu ləğv edilir, onun səlahiyyətlərinin isə digər dövlət qurumları arasında bölüşdürülməsi nəzərdə tutulur.
Crossmedia.az bu barədə Gürcüstan mediasına istinadən xəbər verir.
Hakimiyyət təmsilçiləri bildiriblər ki, qərarın məqsədi idarəetmənin optimallaşdırılması və funksiyaların təkrarlanmasının qarşısını almaqdır. Onların sözlərinə görə, korrupsiya ilə mübarizə mexanizmləri saxlanılacaq və müvafiq dövlət strukturları tərəfindən davam etdiriləcək.
Müxalifət isə qanunu kəskin tənqid edib. Onlar hesab edirlər ki, Antikorrupsiya Bürosunun ləğvi Gürcüstanda şəffaflığın azalmasına və korrupsiyaya qarşı mübarizənin zəifləməsinə gətirib çıxara bilər. Müxalifət deputatları bu addımı siyasi nəzarətin gücləndirilməsi kimi qiymətləndiriblər.
Qanun artıq prezidentə imzalanmaq üçün göndərilib və təsdiqləndiyi təqdirdə yaxın vaxtlarda qüvvəyə minəcək.
Günel Verdiyeva
19:45 17.12.2025
Oxunuş sayı: 895
