Misirin Qahirə şəhərində “Fətva və humanitar gerçəklik problemləri: müasir çətinliklərlə ayaqlaşan rasional ictihada doğru” şüarı ilə keçirilmiş beynəlxalq konfransda 50-dən çox ölkədən müftilər, şəriət alimləri, ekspertlər və mütəxəssislər iştirak edib.
Crossmedia.az xəbər verir ki, tədbirdə Azərbaycan diasporunun sədri və Dünya Azərbaycanlı Alimlər Birliyinin həmsədri tədqiqatçı-alim Seymur Nəsirov Azərbaycandakı tolerantlıq mühitindən danışıb. O qeyd edib ki, Azərbaycan dünyada tolerant ölkə kimi tanınır, ölkəmizdə multikulturalizm və xalqların birgəyaşayış ənənələri qədim tarixə malikdir.
S. Nəsirov əlavə edib ki, radikalizmlə mübarizədə bütün ölkələr bir-birinə dəstək olmalıdır və tolerantlıq mühitinin inkişafı üçün təhsil, ailə institutu və milli mənəvi dəyərlərin möhkəmləndirilməsi mühüm rol oynayır.
Konfransın sonunda Misir müftisi və Dünya Fətva Evləri və Qurumları Baş Katibliyinin rəhbəri Nəzir Məhəmməd Əyyad dini fəaliyyətində və fətva sahəsində töhfələrinə görə seçilən müfti və alimi təltif edib. Təltif olunanlar arasında Misir-Azərbaycan Dostluq Cəmiyyətinin İdarə Heyətinin sədri, tədqiqatçı-alim Seymur Nəsirov da yer alıb.
