ŞAD XƏBƏR: Alimlərin maaşı artırılır: Elmi sferaya sosial dəstək güclənəcək
Azərbaycan elmi ictimaiyyətində uzun müddətdir müzakirə olunan əsas məsələlərdən biri – alimlərin əməkhaqlarının artırılması – nəhayət, daha konkret mərhələyə qədəm qoyur. Alimlərin əməkhaqlarının artırılması elmi sahənin inkişafı və mütəxəssislərin sosial rifahının yaxşılaşdırılması baxımından artıq zəruri addıma çevrilib. Ölkədə gözlənilən ümumi maaş artımın elmi işçiləri də əhatə etməsi ilə bağlı yayılan xəbərlər bu istiqamətdə ümidləri daha da gücləndirir.
Mövzu ilə bağlı AMEA Fəlsəfə və Sosiologiya İnstitutunun şöbə müdiri, fəlsəfə doktoru Faiq Ələkbərov Crossmedia.az-a açıqlama verib: “Azərbaycan Milli Elmlər Akademiyasında alimlərin maaşının artırılması məsələsi hər dəfə gündəmə gəlir. Arada-sırada müəyyən artımlar da olub. Akademiyanın prezidenti İsa Həbibbəyli bildirib ki, 2026-cı ildə də alimlərin maaşında müəyyən artımlar gözlənilir. Hazırkı maaşlarla elmi işlərin aparılması, tədqiqatların həyata keçirilməsi, kitabların yazılması və digər işlərin görülməsi asan deyil. Alimlərə daha çox diqqət yetirilməlidir. Azərbaycan qabaqcıl ölkələrdən sayılır və bu baxımdan alimlərin maaşı da ən azı ölkənin səviyyəsinə uyğun olmalıdır. Əgər maaşlar buna uyğun olmasa da, alimlərin elmi iş aparması və digər məsələlərdə onlara şərait yaradılmalıdır”.
Ekspert qeyd edib ki, alimlərin maaşının artırılması və sosial vəziyyətlərinin yaxşılaşdırılması, həmçinin onların məqalələrinin dərci, kitablarının nəşri və beynəlxalq konfranslarda iştirakı üçün diqqət yetirilməlidir: “Bildirib ki, bu məsələyə ciddi yanaşılacaq və sözün həqiqi mənasında elm üçün çalışan, elmi tədqiqat aparan alimlər dəyərləndiriləcək. Alimlərin maaşlarında artımlar olmalı və onların sosial təminatı təmin edilməlidir”.
Zeynəb Xuduyeva
15:45 11.12.2025
Oxunuş sayı: 2833
