Azərbaycanla Gürcüstan arasında əməkdaşlıq genişlənir- Sabiq nazir
Azərbaycan və Gürcüstan arasında təhsil sahəsində əməkdaşlıq uzun illərdir ki, qarşılıqlı etimad və strateji tərəfdaşlıq prinsipləri üzərində inkişaf edir. Dekabrın 6-da Tbilisidə baş tutan görüş zamanı Azərbaycan Respublikasının elm və təhsil naziri Emin Əmrullayevin rəhbərlik etdiyi nümayəndə heyəti ilə Gürcüstanın təhsil, elm və gənclərlə iş üzrə naziri Givi Mikanadze ikitərəfli əməkdaşlığın gələcək perspektivlərini müzakirə edib.
Görüş zamanı təhsil, elm və gənclərlə iş sahələrində əlaqələrin daha da dərinləşdirilməsi və yeni birgə layihələrin həyata keçirilməsi məsələləri diqqət mərkəzində olub. Həmçinin ali və ümumi təhsil pillələrində islahatların planlaşdırılması, gürcü və azərbaycan dilli məktəblərə dərsliklərin vaxtında çatdırılması, etnik azlıqların təhsilə inteqrasiyasının gücləndirilməsi və ali təhsil müəssisələri arasında tərəfdaşlıq əlaqələrinin genişləndirilməsi ilə bağlı fikir mübadiləsi aparılıb.
Bu görüş iki ölkə arasında təhsil sahəsində mövcud uğurlu əməkdaşlığın yeni istiqamətlər üzrə daha da inkişaf etdirilməsi və regionda təhsil, elm və gənclər siyasətinin səmərəli həyata keçirilməsi üçün mühüm zəmin yaratdığını göstərir.
İki ölkə arasında təhsil sahəsində olan əlaqələrlə həmçinin onun üstünlükləri ilə bağlı sabiq təhsil naziri Misir Mərdanov Crossmedia.az-la öz fikirlərini bölüşüb: "Azərbaycanla Gürcüstan arasında təhsil əlaqələri əvvəlki dönəmlərdən mövcud olub. İndi isə bu daha da genişləndirilməkdədir. Bu iki ölkə üçün də çox müsbət haldır. Bunun həm Azərbaycan təhsilinə, həm də Gürcüstan təhsilinə öz xeyri olacaq".
Elmir Heydərli
12:49 08.12.2025
Oxunuş sayı: 1388
