Gənclər necə aqressiyadan uzaq qala bilər?
Son illər gənclər və yeniyetmələr arasında aqressiv davranışların artması müşahidə olunur. Mütəxəssislər bunun səbəblərini təkcə sosial və iqtisadi vəziyyətlərlə deyil, həm də insanların gündəlik həyat tərzi və ünsiyyət vərdişləri ilə izah edirlər. Artıq insanlar əvvəllər olduğu kimi bir-birinin evinə qonaq getmir, uşaqlar valideynləri ilə daha az ünsiyyət qurur, gündəlik söhbətlər və üz-üzə qarşılıqlı əlaqələr azalır. Əvəzində hər kəsin əlində telefon və ya kompüter var və zamanının çox hissəsini sosial şəbəkələrdə keçirir.
Məsələ ilə bağlı Crossmedia.az-a psixoloji rəyini bildirən psixoloq Sevinc Həbibova qeyd edib ki, insanlar hazırda sosial şəbəkədə çox zaman keçirirlər:
" Təbii ki, sosial şəbəkələrin mənfi tərəfindən əlavə müsbət tərəfi çoxdur. Belə ki, sosial şəbəkə bizim mariflənməyimizə kömək edən vasitələrdən biridir . İllər öncə sosial şəbəkə o qədər də yayqın deyildi. İnsanlar bir-birlərinin evlərinə qonaq gedər, uşaqlar valideynləri ilə tez-tez ünsiyyət qurardılar. Lakin indi hərənin əlində telefon və ya kompüter var və insanlar sosial şəbəkədə zaman keçirirlər. Bu da insanı ünsiyyətdən kənara çəkir. İnsanların içlərində doldurduğu qəzəb bundandır".
Psixoloq vurğulayıb ki, insanlar ən çox da tək qaldıqda ünsiyyətsiz olur. Bu zamanda artıq hər şeyi özü tək başına həll etmək istəyir:
"Aqressiyası çox olan gənclərimiz psixoterapevtlərə, sosioloqlara, psixoloqlara və nevroloqlara müraciət etsələr həm aqressiyadan azad olarlar həm də depressiyalar azalar".
Fatimə Məmmədova
09:15 06.12.2025
Oxunuş sayı: 2091
