Sosium

Lənkəranda xüsusi qayğıya ehtiyacı olan uşaqlarla görüş keçirilib

Beynəlxalq Əlillər Günü ilə əlaqədar Lənkəran Dövlət Dram Teatrı və Heydər Əliyev Mərkəzinin birgə təşkilatçılığı ilə teatrın kollektivi Lənkəran şəhər internat tipli xüsusi ümumitəhsil məktəbində olub. Tədbir çərçivəsində “Möcüzə Uşaqlar” adlı rəngarəng və əyləncəli proqram təqdim olunub.

Crossmedia.az xəbər verir ki, teatr əməkdaşları məktəbin şagirdləri ilə görüşərək onlar üçün maraqlı səhnəciklər, oyunlar və interaktiv çıxışlar nümayiş etdiriblər. Məqsəd xüsusi qayğıya ehtiyacı olan uşaqlara mənəvi dəstək olmaq, onların sosial həyata fəal şəkildə inteqrasiyasına töhfə vermək olub.

Vurğulanıb ki, fiziki məhdudiyyətli uşaqların sosial müdafiəsi, təhsili, reabilitasiyası və cəmiyyətə inteqrasiyası Azərbaycan dövlətinin əsas prioritet istiqamətlərindəndir.

Ölkəmizdə bu kateqoriyadan olan şəxslərin hərtərəfli inkişafı üçün yaradılan geniş imkanlar, həyata keçirilən dövlət proqramları və göstərilən xüsusi qayğı müasir sosial siyasətin aparıcı sütunlarından birini təşkil edir.(AZƏRTAC)