Sosium

Pedaqoji Universitetdə Beynəlxalq Əlilliyi olan Şəxslər Günü qeyd olunub

Azərbaycan Dövlət Pedaqoji Universitetinin Magistratura və doktorantura şöbəsində Fəlsəfə və sosial elmlər və Xüsusi təhsil kafedraları ilə birgə təşkil edilmiş 3 Dekabr – Beynəlxalq Əlilliyi olan Şəxslər Gününə həsr edilmiş tədbir keçirilib.

Bu barədə Crossmedia.az-a universitetdən məlumat verilib.

Tədbiri açan Magistratura və doktorantura şöbəsinin müdiri siyasi elmlər üzrə fəlsəfə doktoru Rəşad Sadıqov ölkəmizdə əlilliyi olan şəxslərə, o cümlədən dövlətimizin suverenliyi, ərazi bütövlüyü uğrunda mübarizə apararkən əlil olmuş qazilərimizə, əlilliyi olan idmançılara Azərbaycan Respublikasının Prezidenti, Müzəffər Ali Baş Komandan İlham Əliyevin və Azərbaycanın birinci xanımı Mehriban Əliyevanın böyük diqqət və qayğısından söz açıb.

Sonra Xüsusi təhsil kafedrasının baş müəllimi Zeynəb Məmmədova “Əlillik məhdudiyyət yox, fərqlilikdir” mövzusunda məruzə ilə çıxış edib. Məruzədə Beynəlxalq Əlilliyi olan Şəxslər Gününün təsis edilməsində əsas məqsədin ictimai həyatın bütün sahələrində əlillərin hüquqlarının qorunmasına nail olmaqdan və ictimaiyyətin diqqətini onların problemlərinə yönəltməkdən ibarət olduğu diqqətə çatdırılıb. Vurğulanıb ki, əlilliyi olan şəxslərin hüquqlarının genişləndirilməsi məhz inklüzivliyin və bərabərliyin təmin olunmasına zəmin yaradır.

Tədbirdə “Doğru bilinən yanlışlar”, “Biz fərqliyik, amma bərabərik”, “Əlillik məfhumu və onun insanlara təsiri” mövzularında çıxışlar dinlənilib. Bildirilib ki, bu günün xüsusi qeyd edilməsi cəmiyyətin yalnız fiziki və psixi baxımından sağlam insanlardan ibarət olmadığını, əlilliyi olan şəxslərə xoş münasibət göstərilməsinin, onlara uyğun infrastruktur imkanlarının yaradılmasının daim diqqət mərkəzində saxlanılmasının vacibliyini hər birimizə bir daha xatırladır. Belə ki, cəmiyyət fərqli insanlar toplusu olduğuna görə onların arasında fiziki, psixoloji və ya intellektual çətinliklərlə yaşayanlar da var. Lakin bu fərqliliklər onları cəmiyyətin kənarında yox, cəmiyyətin mərkəzində görməyi tələb edir.