BDU 1 saylı korpusu müasir avadanlıq və şəraitlə təchiz olunacaq
Bakı Dövlət Universitetinin (BDU) 1 saylı tədris korpusunda ən müasir standartlara cavab verən əsaslı təmir planlaşdırlır.
Bu barədə Crossmedia.az-ın sorğusuna cavab olaraq BDU-nin Mətbuat Xidmətindən məlumat verilib.
Qeyd edilib ki, qanunvericiliyə əsasən, bununla əlaqədar sənədləşmə işləri aparılır və proses bitmək üzrədir:
"Əsaslı təmirdə binanın zirzəmisindən damına qədər bütün mərtəbələr, auditoriyalar, inzibati otaqlar, laboratoriyalar, sanitar qovşaqlar, liftlər müasir standartlara uyğun şəkildə yenidən qurulacaq, elmi-tədqiqat laboratoriyaları yeni cihaz və qurğularla təchiz olunacaq. Binada yerləşən kitab fondları və oxu zalları yenilənəcək, professor-müəllim heyəti üçün yaradıcılıq otaqları, xüsusi müzakirə otaqları və s. yaradılacaq. Binanın bütün kommunikasiya xətləri, yanğınsöndürmə sistemi yenilənəcək. Auditoriyalar ən müasir elektron avadanlıqlar, kondisioner və mebellərlə təzhiz olunacaq. Eyni zamanda binanın həyətyanı sahəsi və Universitetin ümumi girişi yenidən qurulacaq, abadlaşdırılacaq".
Həmçinin, "Tədris prosesinin təkmilləşdirilməsi, elmi tədqiqatların keyfiyyətinin yüksəldilməsi məqsədilə maddi-texniki bazanın müasir tələblərə cavab verməsi üçün tədbirlər görülür. Binanın əsaslı təmiri zamanı tələbələr müasir tədris prosesi üçün zəruri şəraiti olan məkanda dərslərinə davam edəcəklər. Tədrisin fasiləsizliyi təmin olunacaq", - deyə, məlumatda qeyd olunub.
14:49 01.12.2025
Oxunuş sayı: 1318
