Əli Kərimlinin saxlanılması illərlə yığılan şübhələri təsdiqləyən arqumentdir - Partiya sədri
Uzun illərdir müxalifət düşərgəsində “lider” kimi təqdim olunan Əli Kərimli haqqında dolaşan şübhələr bu gün artıq sadəcə söz-söhbət deyil, konkret ittihamlarla gündəmə gəlir. Onun fəaliyyətindəki radikallıq, müxalifət birliyini sistemli şəkildə parçalamaq cəhdləri, kütləvi aksiyaların məqsədli şəkildə zəiflədilməsi və müxtəlif gizli dairələrlə əlaqələrə dair illərlə səslənən iddialar indi daha real kontur alır. Ən təhlükəlisi isə odur ki, Kərimlinin ölkə daxilində xaos yaratmaq, cəmiyyəti qarşıdurmaya sürükləmək və siyasi prosesləri manipulyasiya etmək istiqamətində addımlarının arxasında başqa mərkəzlərin dayandığı ehtimalı indi istintaqa daşınıb. Dövlət çevrilişinə cəhd, vətənə xəyanət və böyük məbləğdə vəsaitlərin mənimsənilməsi ilə bağlı irəli sürülən ittihamlar illərdir müxalifət daxilində “pozucu xətt” kimi tanınan davranışların təsadüfi olmadığını göstərən ən ciddi siqnallardır. Bu gün cəmiyyət bir daha görür ki, Əli Kərimlinin radikal siyasəti heç vaxt milli maraqlara xidmət etməyib – əksinə, xalqın ümidini dağıdan, müxalifətin gücünü məhv edən və ölkə daxilində sabitliyi hədəf alan fəaliyyətlərin mərkəzində dayanıb.
"Ədalət" partiyasının sədri Mütəllim Rəhimli "müxalifət lideri" Əli Kərimlinin pozucu fəaliyyəti ilə bağlı fikirlərini Crossmedia.az-la bölüşüb:
"Ədalət Partiyası siyasi arenada həmişə ölkədə demokratik dəyərlərin bərpası, ədalətli və dayanıqlı cəmiyyətin qurulması uğrunda yorulmaz mübarizə aparıb. Bu yol, sadəcə şifahi bəyanatlarla deyil, konkret addımlarla – kütləvi aksiyalara qoşulmaqla, mitinqlərin təşkilatçılarından biri olmaqla və hətta riskli çıxışlarla yerinə yetirilib. Müxalif düşərgədə təmsil olunan digər siyasi qüvvə və partiyalarla qurulan mütəmadi əməkdaşlıq, birliyin gücünün fərdi səylərdən qat-qat üstün olduğunu göstərib. Çünki müxalifətin vahid səsi mövcud problemlərin həllinin əsası və xalqın ümid yeri olub.
Lakin, ötən illərdə bu birliyin qarşısında daxili qüvvələrin məqsədyönlü, bəzən də gizli səbəblərlə törətdiyi parçalanmalar kimi çoxlu maneələr yaradılıb. Müxalifət düşərgəsində milli maraqları ifadə edən vahid mövqe formalaşdırmaq mümkün olmayıb. Bəziləri sanki görünməz əllər tərəfindən idarə olunmaqla, bu cəhdi poza biliblər. Cəmiyyətdə, xüsusilə də, mübarizənin qızğın dövründə fəaliyyət göstərən siyasətçilər arasında bu barədə müəyyən fikirlər, hətta dəqiq məlumatlar və şübhəli ehtimallar hər zaman dolaşıb.
Xüsusilə, Azərbaycan Xalq Cəbhəsi Partiyasının sədri Əli Kərimli haqqında müxalifət daxilində pozuculuq və hazirda vətənə xəyanətdə ittiham olunan Ramiz Mehdiyevlə gizli əlaqələr barədə fikirlər illərdir ki, var. Müxalifətin ən böyük birliyi olan SİDSU-nun mitinqlərinin zəiflədilməsi, onların daha az effektiv yürüşlərlə əvəz edilməsi, ictimai tələblərə deyil, bilinməyən "sifarişlərə" uyğun kütləvi aksiyalara qərar verilməsi, bu şübhələri dəstəkləyən əlamətlər kimi qəbul edilib. Etiraz edənlər isə, sanki xalqın düşməni elan olunaraq, birbaşa hədəfə çevriliblər.
Nəticədə Əli Kərimlinin təşviq etdiyi siyasət nəticəsində ona yaxın adamlar deputat “seçilib” və bütün səmimi, vətənsevər siyasi qüvvələr əzilərək siyasi proseslərdən kənarda saxlanılıb. Sanki kimlərinsə yolu təmizlənib, planlarına mane ola biləcək vətənpərvərlər zərərsizləşdirilib".
Partiya sədri qeyd edib ki, indi isə, AXCP sədri Əli Kərimli dövlət çevrilişinə cəhd, vətənə xəyanət və külli miqdarda dövlət vəsaitlərinin mənimsəlməsi ilə bağlı ittiham olunan Ramiz Mehdiyev işi ilə bağlı saxlanılıb: "Bu illərlə yığılan şübhələri təsdiqləyən bir arqument kimi görünür. Gizli qapılar arxasında sövdələşmələr müxalifətə vurulmuş ən böyük yaralardan biridir. Lakin hazırda əməliyyat və istintaq hərəkətləri gedir. Ona görə də baş verənlərə səbrlə yanaşılmalı və istintaq orqanlarının açıqlamalarını gözləməliyik".
Ayhan
17:29 30.11.2025
Oxunuş sayı: 1256
