Trampın iki ən yaxın adamı üz- üzə: "Sağ qolları rəqibə çevirən səbəb nədir?
ABŞ Dövlət katibi Marko Rubio Ukrayna müharibəsinin başa çatdırılması ilə bağlı müxtəlif mövqelərə görə onunla vitse-prezident Cey Di Vens arasında fikir ayrılığı olduğu barədə məlumatı təkzib edib.
Həmkarlar arasında ixtilaf barədə xəbəri NBC telekanalı yayıb. Məlumatda deyilirdi ki, vitse-prezident Kiyevə təzyiqin artırılmasını, Rubio isə Moskvaya təzyiqin gücləndirilməsini zəruri hesab edir.
Dövlət katibi məqaləni uydurma adlandırıb. "Bu dərc edilən material Ukraynadakı müharibənin necə bitirilməsi ilə bağlı Tramp administrasiyasında guya fikir ayrılığı olduğuna dair tamamilə saxta xəbərlərin uzun silsiləsindən sadəcə daha bir nümunədir", – deyə o yazıb.
Vens Rubionun sözlərini dəstəkləyərək medianı Trampın planlarını pozmaq məqsədilə yalan yaymaqda ittiham edib.
ABŞ daxili siyasətindəki mövcud durum barədə Crossmedia.az-a danışan beynəlxalq münasibətlər üzrə ekspert Əziz Əlibəyli bildirib ki, iki siyasi fiqur arasında yayılan fikir ayrılığı xəbərləri, əslində, ABŞ-nin gələcək siyasi rəhbərliyinə dair rəqabət kontekstində qiymətləndirilməlidir.
Ekspertin sözlərinə görə, hər iki siyasətçinin maliyyələşmə mənbələri və siyasi dayaqları analiz olunduqda, onların ciddi şəkildə yəhudi lobbiləri ilə əlaqələrə söykəndiyi görünür: “Bir müddət Cey Di Vensin Tramp dövrünə hazırlandığı və mümkün prezidentliyə namizəd kimi irəli çıxacağı barədə fikirlər səsləndirilirdi. Lakin son proseslər göstərdi ki, bu istiqamətdə daha şanslı fiqur Marko Rubiodur. Rubio hakimiyyətin formalaşdırılmasında daha təsirli şəxsdir. Yalnız Ukrayna müharibəsi ilə bağlı deyil, digər fundamental məsələlərdə də onların mövqeləri arasında fərqlər var. Bu isə gələcək hakimiyyətin kim tərəfindən idarə olunacağına dair ciddi rəqabətin mövcud olduğunu göstərir.”
Lalə Rəvəndi
14:30 26.11.2025
Oxunuş sayı: 1021
