Suriya-İsrail münasibətləri gərginləşir: Rusiya ordusu yenidən hərbi postlar qura bilər
Suriyanın cənubunda Rusiyanın patrul xidmətini bərpa edəcəyi və hərbi postlar yerləşdirəcəyi barədə İsrail KİV-lərində yayılan məlumatlar regionda yeni siyasi və hərbi dinamikanın yaranacağı barədə suallar doğurur. Bu xəbər əgər doğru olsa, İsrail–Suriya münasibətlərinə birbaşa təsir edə, təhlükəsizlik balansını dəyişdirə və ABŞ-nin regiondakı roluna dair yeni addımlar atılmasına səbəb ola bilər. Lakin belə xəbərlərin dəqiqləşdirilməsinə ehtiyac var, çünki bu məlumatların siyasi taktiki məqsədlərlə yayıldığı ehtimalı da güclüdür. Regiondakı güc bölgüsü, Rusiya və Suriya arasındakı hərbi əməkdaşlıq və İsrailin strateji mövqeyi diqqətlə izlənilməlidir.
Mövzu ilə bağlı Crossmedia.az-a açıqlamasında politoloq Aydın Quliyev bildirib ki, xəbərin inandırıcılığı olduqca zəifdir və İsrail mediasında yayımlanması belə şübhə doğurur:
"Suriya xalqı və hakimiyyəti Rusiyanın hərbi bazalarını ölkədən çıxarmaq üçün böyük çətinliklər yaşamışdı. Yenidən həmin bazaların cənub sərhədlərində yerləşdirilməsi inandırıcı görünmür. Bu məlumat daha çox siyasi taktiki xarakter daşıyır və məqsəd Amerikanı Suriyada daha aktiv fəaliyyətə sövq etmək ola bilər".
Politoloq əlavə edib ki, Rusiya hərbi qüvvələrinin Suriyada, xüsusilə İsrail sərhədində yerləşdirilməsi fikri faktiki olaraq mümkün deyil: "Hətta Aralıq dənizi sahillərində belə Rusiyanın hərbi mövcudluğu indi əvvəlki qədər inandırıcı deyil. Yekun olaraq, İsrailin yaydığı məlumat həqiqətə uyğun deyil və əsasən siyasi taktiki məqsəd güdür.”
Politoloq qeyd edir ki, belə xəbərlər regional aktorların, xüsusilə ABŞ-nin Suriyada mövqeyini aktivləşdirməsi üçün istifadə oluna bilər. Eyni zamanda, bu cür spekulyativ məlumatlar Suriya–İsrail sərhədində gərginlik yaratmaq və regional diplomatik prosesləri manipulyasiya etmək üçün vasitə kimi çıxış edə bilər.
Nigar Yahyazadə
19:15 19.11.2025
Oxunuş sayı: 1036
