Hüseyn Cavidin Naxçıvandakı abidəsi bərpa olunur: Bir əsrin səsini, hekayəsini gələcək əsrlərə ötürür...
Naxçıvan şəhərində Azərbaycanın görkəmli şairi və dramaturqu Hüseyn Cavidin məqbərəsinin bərpa ediləcəyi bildirilib. Bu məqsədlə Mədəniyyət Nazirliyi layihə–smeta sənədlərinin hazırlanması üçün satınalma prosesinə start verib. Hüseyn Cavidin məqbərəsi XX əsr ədəbiyyatının və faciəli tarixi hadisələrin simvolu sayılan irsin mühüm bir parçasıdır. Abidənin yenilənməsi onun həm mədəni, həm də tarixi əhəmiyyətinin qorunmasına xidmət edəcək. Bərpa işləri Cavid irsinin gələcək nəsillərə daha sağlam şəkildə çatdırılması baxımından da önəmli addım hesab olunur. Bu proses Naxçıvanın mədəni irsinin yenidən canlandırılması istiqamətində həyata keçirilən layihələrdən biri kimi dəyərləndirilir.
Ədəbiyyatşünas-alim Məti Osmanoğlu bu barədə Crossmedia.az-a danışıb.
O, bildirib ki, Hüseyn Cavidin adı Azərbaycan xalqının mədəni yaddaşının həmişəyaşar simvollarındandır: "Bu simvol iki mənanı- həm düşüncənin, bədii sözün böyüklüyünü və ölməzliyini, həm də müstəmləkə əsarətinin, ideoloji təzyiqlərin fiziki cəhətdən məhv etdiyi insan taleyini ifadə etməkdədir. Hüseyn Cavidin taleyi təzadlarla və faciələrlə dolu XX əsrin özüdür. XX əsrin qaranlıq siyasi kölgəsi onun həyatının üzərinə düşsə də, Cavid Əfəndinin adı və irsi zamanın qovğalarından daha güclü çıxmışdır. Mütəfəkkir şairin Sovet hakimiyyəti dövründə, 1938-ci ildə repressiya olunması, Bakıdan gedər-gəlməzə - uzaq Sibirə aparılması, orada məhbəs şəraitində həlak olması, siyasi rejim dəyişəndən sonradan ona bəraət verilməsi və nəhayət, o vaxt Sovet hökumətinin yüksək səlahiyyətli və nüfuzlu rəhbərlərindən olan Heydər Əliyevin şəxsi təşəbbüsü və siyasi iradəsi ilə cənazəsinin Azərbaycana gətirilməsi və doğma Naxçıvan torpağında dəfn edilməsi tariximizin ən təzadlı hekayələrindən biridir".
Alim şairin 1996-cı ildə – Azərbaycanın müstəqilliyi dövründə ucaldılmış məqbərəsi bu təzadlı hekayənin abidəsinin olduğunu vurğulayıb: "Adətən bu cür abidələr, məsələn, Naxçıvandakı Möminə Xatun türbəsi kimi, bir əsrin səsini, hekayəsini gələcək əsrlərə və nəsillərə ötürür. Belə bir abidənin yaşadılmasını, qorunmasını və gələcək nəsillərə ötürülməsini mənəvi borcumuz hesab edirəm".
Fidan Bəhmənova
16:11 14.11.2025
Oxunuş sayı: 4515
