Üçuşaqlı ailələr də çoxuşaqlı ailə hesab oluna bilər...
Milli Məclisin Ailə, qadın və uşaq məsələləri komitəsinin sədri Hicran Hüseynova parlamentin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında 2026-cı ilin dövlət büdcəsi layihəsinin müzakirəsi zamanı üç və daha çox uşağı olan qadınlar üçün müəyyən güzəştlərin tətbiqi təklif edilib. Bu, çoxuşaqlı ailələrin artması üçün də bir stimul ola bilər.
Sözügedən təklif barədə sosioloq Üzeyir Şəfiyev Crossmedia.az-a açıqlamasında bildirib ki, hazırda Azərbaycanda qanunvericiliyə görə beş və daha çox uşağı olan ailələr çoxuşaqlı hesab olunur: "Milli Məclisdə isə üç və daha çox uşağı olan ailələrin də çoxuşaqlı sayılması ilə bağlı təklif müzakirə olunur. Əgər bu qanun qəbul olunarsa, üçuşaqlı ailələr də indiki beşuşaqlı ailələrə şamil olunan imkanlardan yararlana biləcəklər. Hələlik üçuşaqlı ailələr rəsmi olaraq çoxuşaqlı sayılmır. Lakin qanun qəbul olunarsa, onların da çoxuşaqlı ailələr kimi müxtəlif güzəştlərdən faydalanması mümkün olacaq. Bu dəyişiklik gənc ailələr arasında ailə planlaşdırılmasına və demoqrafik artıma müsbət təsir göstərə bilər. Eyni zamanda, bunun yeganə həll olmadığını nəzərə almaq lazımdır. Gənc ailələrə əlavə dəstək tədbirləri də vacibdir. Məsələn, güzəştli mənzil proqramlarının genişləndirilməsi, gənclərin məşğulluğunun təmin olunması kimi tədbirlər".
O söyləyib ki, Türkiyədə 2025-ci ildə maraqlı addımlar atılıb: "Bələdiyyələr və dövlət qurumları gənclərin toy xərclərini qarşıladı, məşğulluq marafonları təşkil etdilər və gənc ailələrə faizsiz güzəştli kreditlər verdilər ki, ailələr 4 ildən sonra hissə-hissə ödəməyə başlasın. Azərbaycanda da oxşar layihələr həyata keçirilə bilər və bu, gənc ailələr üçün motivasiyaedici tədbir kimi dəyərlidir".
Lalə Rəvəndi
15:27 13.11.2025
Oxunuş sayı: 1424
