Professor: Hərbi - vətənpərvərlik mövzusunda filmlərin çəkilməsi çox önəmlidir
Bu il artıq tarixi Vətən müharibəsindəki qələbəmizdən beş il keçir. Həmin dövrün qəhrəmanlıq ruhu bu gün də xalqımızın yaddaşında yaşayır. Qələbəmizin bizə yaşatdığı fəxarət, qürur və baş ucalığı artıq məişətimizə, həyat tərzimizə də sirayət edib və yeni bir vərdiş, bir ruh yaradıb. Bu gün qəhrəmanlıq ruhu nəinki xalqımızın yaddaşında yaşayır, hətta yazılan, bəstələnən musiqilərdə də əks olunur. Nisgilli, vətən həsrətli şeirlərin yerini isə zəfər qoxulu misralar tutur. Bu qəhrəmanlıq ruhu bu gün kino sənətimizdə də öz əksini tapır.
Kino tarixən cəmiyyətin mənəvi dünyasını formalaşdıran, insanların düşüncəsinə və duyğularına təsir edən ən güclü vasitələrdən biri olub. O, həm tarixi yaddaşın qorunmasına, həm də gələcək nəsillərə milli dəyərlərin ötürülməsinə xidmət edir. Məhz buna görə də, vətənpərvərlik mövzulu filmlərin çəkilməsi bu gün də böyük əhəmiyyət daşıyır.
Filmlər müharibə iştirakçılarının keçirdiyi hissləri tam şəkildə təsvir edə bilməsələr də, onların yaşadıqları ağrını, qüruru, həyəcanı və ən əsası — qələbə sevincini hiss etdirə bilən ən təsirli sənət növlərindən biridir. Belə ekran əsərləri gənc nəsildə vətən sevgisini, milli kimliyi və qəhrəmanlıq ruhunu qoruyub saxlamağa xidmət edir.
Azərbaycan mədəniyyət nazirinin müavini Fərid Cəfərov Milli Məclisin Gənclər və idman, İctimai birliklər və dini qurumlar, Mədəniyyət komitələrinin bugünkü birgə iclasında bildirib ki 2023-2025-ci illərdə Azərbaycanda 71 filmin istehsalına başlanıb və bunlardan 50-si təhvil verilib. Hazırda isə Azərbaycanda vətən müharibəsi ilə bağlı 5 film çəkilir.
Müharibə ilə bağlı çəkilən filmlərin əhəmiyyəti barədə Əməkdar Jurnalist, BDU-nun professoru Qulu Məhərrəmli Crossmedia.az-a danışıb:
"Əlbəttə, bu filmlərin yaxşı cəhəti ondan ibarətdir ki, vətənpərvərlik mövzusu ön plandadır və kino ustaları bu mövzunu böyük məharətlə ekranlara gətirirlər. Onlar maraqlı ssenarilər və təsirli süjetlər qurmağa çalışırlar. Belə filmlərin çox böyük əhəmiyyəti var.
Birinci növbədə, gənclərdə vətənə, torpağa, müstəqil Azərbaycana məhəbbət formalaşdırır.
İkincisi, milli kimliyin dərk olunmasına kömək edir.
Üçüncüsü isə qan yaddaşını və qəhrəmanlıq yaddaşını bərpa edir.
Bu filmlərin köməyi ilə gənclərimiz tariximizə səyahət edə bilir, bu günün gerçəkliklərini daha dərindən dərk edir. Eyni zamanda, ulu babalarımızdan gələn vətənpərvərlik, vətəni və dövləti qorumaq, ölkəni yadelli işğalçılardan azad etmək kimi mesajlar bu filmlər vasitəsilə auditoriyaya ötürülür.
Nəhayət, hesab edirəm ki, belə filmlərin çəkilməsi çox önəmlidir. Əlbəttə, arzu edərdik ki, bu ideyalar daha yüksək peşəkar səviyyədə, daha geniş miqyasda və kino sənətinin bütün imkanlarından istifadə olunaraq təqdim edilsin. Lakin bu, çox vaxt maliyyə məsələlərindən asılı olur. Rejissorlar verilən maliyyə imkanları daxilində bu ideyanı gerçəkləşdirməyə çalışırlar. Bununla belə, belə mövzuların işlənməsi və vətənpərvərlik ruhunun ekranlarda əks olunması təqdirəlayiq haldır."
Gülbəniz Bayramova
20:10 12.11.2025
Oxunuş sayı: 1563
