Tailand Kamboca ilə sülh bəyannaməsini dayandırdı
Tailand və Kamboca arasında uzun illərdir sərhəd boyunca gərginlik və həssaslıq mövcuddur. Tailandın Baş naziri Anutxin Çanvirakun Kamboca ilə imzalanmış birgə sülh bəyannaməsinin qüvvəsinin dərhal dayandırılması barədə göstəriş verib.
Bu barədə Crossmedia.az “The Nation”qəzetinə istinadən xəbər verir ki, qərar sərhəddə patrul xidməti zamanı iki tailandlı hərbçinin piyada əleyhinə mina partlayışı nəticəsində yaralanmasından sonra qəbul edilib.
Baş nazir bildirib: “Bizim nail olmağa çalışdığımız proses aydınlıq yaranana qədər təxirə salınmalıdır. Baş verənlər göstərir ki, ölkəmizin təhlükəsizliyinə qarşı düşmənçilik hələ də azalmayıb”. O, silahlı qüvvələrə dəstəyini ifadə edib.
Hökumətin mətbuat katibi Siriphong Anqkasakunkiyet isə bildirib ki, 12 noyabrda nəzərdə tutulan kambocalı hərbi əsirlərin azad edilməsi prosesi də dayandırılacaq. Onun sözlərinə görə, növbəti addımlar insidentin araşdırılmasının nəticələrindən asılı olacaq.
15:48 10.11.2025
Oxunuş sayı: 1263
