ABŞ-nin NATO səfiri: Avropa Ukraynaya dəstəyini artırmalı və müdafiəyə sərmayə qoymalıdır
ABŞ-nin NATO-dakı səfiri Metyu Uitaker Avropanı Ukraynaya dəstəyini artırmağa və müdafiə sahəsinə daha çox sərmayə yatırmağa çağırıb.
Crossmedia.az xəbər verir ki, o, bu barədə Ukraynaya səfərindən qayıtdıqdan sonra açıqlama verib. Uitaker bildirib ki, Ukraynada vəziyyətin gərgin qalması fonunda Avropa ölkələrinin məsuliyyəti daha da artır və onlar təhlükəsizliyə yönəlik siyasətlərində daha fəal olmalıdırlar.
Səfirin sözlərinə görə, Avropa dövlətləri həm Ukraynaya yardım, həm də öz müdafiə qabiliyyətlərini gücləndirmək baxımından kifayət qədər təşəbbüskar davranmırlar. Uitaker qeyd edib ki, NATO-nun əsas məqsədlərindən biri məhz bu istiqamətdə səylərin artırılmasıdır.
“Bu, Avropanın müharibəsidir və onun məsuliyyətini də avropalılar daşımalıdırlar. Həm Ukraynaya daha çox yardım göstərilməli, həm də müdafiə sənayesinə daha çox vəsait yatırılmalıdır”, – səfir vurğulayıb.
O, həmçinin qeyd edib ki, Avropa ölkələrinin müdafiə sənayesinin istehsal gücü hazırkı vəziyyətin tələblərinə cavab vermir və bu sahədə sistemli problemlər aradan qaldırılmalıdır.
Türkan Kərimli
17:10 09.11.2025
Oxunuş sayı: 1748
