Həmişə Putinin yanında olan Lavrov TŞ-in iclasında niyə iştirak etməyib?- Müəmma
Rusiya xarici işlər naziri Sergey Lavrovun Kremlin Təhlükəsizlik Şurasının iclasında iştirak etməməsi diqqət çəkib.
Crossmedia.az xəbər verir ki, bu barədə “Kommersant” nəşri məlumat yayıb.
Məlumata görə, iclas Rusiya Prezidenti Vladimir Putinin nüvə silahlarının sınaqdan keçirilməsi ilə bağlı tapşırıq verdiyi mühüm görüş olub. Təhlükəsizlik Şurasının daimi üzvləri arasında yalnız Lavrovun iştirak etməməsi müxtəlif ehtimallara səbəb olub.
Qərb mediası bildirir ki, bu hadisə prezidentin ən yaxın komandasında gərginlik yarandığı barədə təəssürat formalaşdırıb.
“Kommersant”ın məlumatına əsasən, Lavrovun iclasda olmaması “razılaşdırılmış” şəkildə baş verib.
Bununla belə, onun həm Kremlin toplantısından, həm də G20 nümayəndə heyətindən kənarda qalması, Rusiya rəhbərliyində nüfuz itkisi ilə üzləşdiyi ehtimalını gücləndirib.
“Sky Nuys” televiziya kanalının məlumatına görə ABŞ Prezidenti Donald Trampın ötən ay Budapeştdə Putinlə planlaşdırılan zirvə görüşünü Lavrovla ABŞ dövlət katibi Marko Rubio arasında telefon danışığından sonra ləğv etməsindən sonra fikir ayrılığı barədə şayiələr artmaqdadır.
“Financial Times” qəzetinin məlumatına görə, Ağ Evi zirvə görüşünü dayandırmağa vadar edən Lavrovun barışmaz mövqeyi olub.
Türkan Kərimli
15:42 09.11.2025
Oxunuş sayı: 1431
