Politoloq: İsrailin Livana qarşı hərbi əməliyyatları mürəkkəb səbəblərə əsaslanır
Yaxın Şərqdə hərbi-siyasi vəziyyət bir daha gərgin mərhələyə daxil olub. İsrailin Livanın cənubunda yerləşən Burc-Rahal bölgəsinə endirdiyi hava zərbəsi nəticəsində bir nəfərin həlak olması, bir nəfərin isə yaralanması regionda vəziyyətin daha da kəskinləşdiyini göstərir. Livan Səhiyyə Nazirliyinin verdiyi məlumata görə, hadisə məktəbin yaxınlığında baş verib və bu, məktəblilər arasında ciddi çaxnaşmaya səbəb olub. İsrail Silahlı Qüvvələrinin rəsmi nümayəndələri hadisə ilə bağlı hələlik şərh verməyiblər. Bu insident İsrail-Livan sərhədində davam edən qarşıdurmaların təhlükəli mərhələyə keçdiyini bir daha təsdiqləyir.
Crossmedia.az-a danışan politoloq, professor Əlimusa İbrahimov bildirib ki, İsrailin Livana qarşı bu vaxta qədərki və bundan sonra baş verə biləcək hərbi əməliyyatlarının səbəbləri mürəkkəbdir və onilliklərdir davam edən düşmənçiliyə əsaslanır: “İsrail əsas səbəbin Livan dövlətində deyil, onun ərazisində fəaliyyət göstərən güclü qeyri-dövlət aktoru — Hizbullahda axtarılmalı olduğunu vurğulayır. Hizbullah İran tərəfindən dəstəklənən və Livan milli ordusundan daha güclü hərbi qüvvə hesab edilən şiə siyasi partiyası və militant qrupudur. İsrail isə Hizbullahı öz mövcudluğu üçün birbaşa təhlükə sayır və onun regionda fəaliyyət imkanlarını tamamilə məhdudlaşdırmaq istəyir".
Politoloq xatırladıb ki, 2006-cı il Livan müharibəsindən bəri Hizbullahın 150–200 min arasında olduğu təxmin edilən raket arsenalı İsrail üçün daimi təhlükə yaradır: “İsrailin təhlükəsizlik doktrinasının əsas hissəsi çəkindirməni qorumaqdır. Əgər Hizbullah hücuma keçərsə və ya İsrail hücumun qaçınılmaz olduğunu hiss edərsə, güclü cavab zərbəsi endirmək məcburiyyətində qalır. Bu isə qarşılıqlı qisas və cavab hücumlarının bitməyən dövrünü formalaşdırır".
Professor əlavə edib ki, oktuabrın yeddisi HƏMAS-ın ücumundan sonra Hizbullah demək olar ki, hər gün İsrail ordusu ilə sərhədyanı toqquşmalarda iştirak edir və bu, İsrailin resurslarını Qəzza cəbhəsindən yayındırmaq məqsədi daşıyır: “İsrail üçün bu vəziyyət qəbuledilməz təhlükədir. O, vəziyyəti ya diplomatik, ya da hərbi yolla həll etməyə çalışır. İsrailin Livana qarşı istənilən genişmiqyaslı müharibədə əsas məqsədi Hizbullahın arsenalını, xüsusilə də hava limanları, dəniz limanları və enerji infrastrukturunu hədəf ala bilən uzun mənzilli raketlərini məhv etməkdir. Bununla yanaşı, İsrail Hizbullahın komanda mərkəzlərini, silah anbarlarını və İran təchizat xətlərini də zərərsizləşdirməyə çalışacaq.
Politoloq onu da vurğulayıb ki, BMT Təhlükəsizlik Şurasının 1701 saylı qətnaməsi çərçivəsində İsrailin əsas tələbi Hizbullah qüvvələrinin Litani çayının şimalına çəkilməsidir: “Bu, Hizbullahın sərhədyanı basqınlar etməsini çətinləşdirəcək və İsrailin şimal bölgələri üçün bufer zonası yaradacaq. Hizbullah İranın bölgədəki ən güclü nümayəndəsidir və bu təşkilatla baş verən hərbi toqquşmalar əslində Tehranın təsir dairəsinə qarşı yönəlmiş addımlar kimi qiymətləndirilə bilər. Hizbullahla müharibə təkcə Livanla deyil, dolayısı ilə İranla proksi müharibə kimi də dəyərləndirilə bilər".
Mehriban Yariyeva
12:50 06.11.2025
Oxunuş sayı: 4041
