Moskvada beynəlxalq orqan ticarəti şəbəkəsinin təşkilatçısı saxlanıldı
Rusiyada Almaniya və İsraildə insan orqanları ilə ticarət etməkdə şübhəli bilinən 41 yaşlı israilli Boris Volfman saxlanılıb.
Bu barədə Crossmedia.az Almaniyanın Der Spiegel nəşrindən istinadən xəbər verir.
Məlumata görə, Volfman Almaniya və İsrail vətəndaşları üçün Keniyada qanunsuz böyrək transplantasiyalarını təşkil edən beynəlxalq şəbəkənin əsas fiqurlarından biri hesab olunur.
Der Spiegel, ZDF və Deutsche Welle-nin birgə araşdırması göstərib ki, Volfman bu əməliyyatları Polşada qeydiyyatdan keçmiş “Medlead” şirkəti vasitəsilə həyata keçirib.
Təhlükəsizlik orqanlarının məlumatına görə, transplantasiya ilə bağlı maliyyə əməliyyatları Albaniyada açılmış bank hesabları üzərindən aparılıb və bu sxem həm də pul yuyulması məqsədi ilə istifadə olunub.
Tel-Əviv prokurorluğunun açıqlamasında bildirilir ki, Boris Volfman uzun müddət Interpol xətti ilə beynəlxalq axtarışda olub. Onun həbsi Kosovoda “böyrək biznesi” işi kimi tanınan uzunmüddətli istintaqın davamı kimi qiymətləndirilir.
Mehriban İbrahimli
19:11 08.10.2025
Oxunuş sayı: 8325
