Aİ 2028-ci ilə qədər Rusiya neft və qazının idxalını dayandırmağı planlaşdırır
Avropa İttifaqı ölkələrinin səfirləri çərşənbə günü Rusiya nefti və qazının idxalının 2028-ci ilə qədər mərhələli şəkildə dayandırılmasını nəzərdə tutan planın irəli sürülməsi barədə razılığa gəliblər.
Crossmedia.az xəbər verir ki, bu barədə Reuters diplomatik mənbələrə istinadən məlumat yayıb.
Qapalı iclas zamanı qanun layihəsinin oktyabrın 20-də keçiriləcək nazirlər toplantısında təsdiq üçün təqdim olunması qərara alınıb. Planın əsas məqsədi — Ukraynada aparılan müharibənin maliyyələşdirilməsində istifadə olunan Kremlin gəlirlərini azaltmaqdır.
Əgər qanun qəbul edilərsə: 2026-cı ilin yanvarından etibarən Rusiya qazının yeni müqavilələr üzrə idxalı dayandırılacaq;
Qısamüddətli müqavilələr üzrə idxal 2026-cı ilin iyununda başa çatacaq;
Uzunmüddətli müqavilələr üzrə isə 2028-ci ilin yanvarında tamamilə dayandırılacaq.
Demək olar ki, bütün Aİ ölkələri təşəbbüsü dəstəkləyib, baxmayaraq ki, Macarıstan və Slovakiya müqavimət göstərib. Qanunun qəbul olunması üçün Aİ-yə üzv dövlətlərin 55 faizinin dəstəyi tələb olunur.
Qeyd edək ki, hələlik açıq qalan əsas məsələlərdən biri — maye qazın (SPG) Avropa limanlarına daxil olarkən mənşəyinin yoxlanılıb-yoxlanılmayacağıdır. Fransa və İtaliya bu nəzarət mexanizminin tətbiqini tələb edir.
Hazırda Rusiya qazı Aİ-nin ümumi qaz idxalının təxminən 12 faizini təşkil edir (2022-ci ilə qədər bu göstərici 45 faiz idi). Bununla belə, Macarıstan, Fransa və Belçika hələ də rus qazı alır.
Yeni qanun Macarıstan və Slovakiyanı 2028-ci ilə qədər Rusiya neftindən imtina planı hazırlamağa da məcbur edəcək. Bununla yanaşı, Aİ 2027-ci ilin yanvarından Rusiya mənşəli SPG-nin idxalını qadağan edən ayrıca sanksiya paketini də müzakirə edir.
Xumar Emilqızı
18:24 08.10.2025
Oxunuş sayı: 8907
