Paşinyan: “Hərbi qulluqçular arasında dövlətə xəyanət halları çoxdur, amma bu mövzu müzakirə olunmur”
Ermənistanın baş naziri Nikol Paşinyan bildirib ki, ölkədə hərbi xidmətdə olan şəxslər tərəfindən dövlətə xəyanət halları çox olsa da, bu barədə açıq danışmaq qəbul edilmir.
Crossmedia.az xəbər verir ki, Paşinyan bu fikirləri İstintaq Komitəsi əməkdaşlarının peşə bayramına həsr olunmuş tədbirdə səsləndirib.
O qeyd edib ki, bu halların araşdırılması gizli qaydada aparıldığından, məhkəmələr də qapalı keçirilir:
“Sonra insanlar təəccüblənirlər ki, bu necə ola bilər? Amma həmin məlumatlara bələd olanlar düşünürlər ki, bu hadisələr nədən xəbər verir — şəxsin xarakterindəki problemlərdən, cəmiyyətin içindəki gərginlikdən, dövlət sistemindəki nasazlıqlardan, yoxsa qanunvericilikdəki çatışmazlıqlardan?” – deyə Paşinyan vurğulayıb.
Baş nazir əlavə edib ki, son illərdə belə onlarla hadisə baş verib:
“Biz vətən haqqında çox danışırıq, hər kəsi qəhrəman adlandırırıq, amma sonra məlum olur ki, o qəhrəman xəyanət edib. Biz anlamalıyıq ki, nədə səhv edirik. Bu, ideallarımızla reallıq arasında balans tapmaq üçün mühüm fürsətdir.”
18:02 08.10.2025
Oxunuş sayı: 8774
