Tramp Yaxın Şərqdə yaranmış qorxunc vəziyyəti idarə etmək üçün fərqli yollar axtarmağa məcburdur – Rəy
Qətərin baş naziri və xarici işlər naziri Şeyx Məhəmməd bin Əbdülrəhman bin Casim əl-Tani bildirib ki, ABŞ Prezidenti Donald Trampın Qəzza üçün təqdim etdiyi plan atəşkəsi təmin edə bilər, lakin sənəddə aydınlaşdırılmalı və danışıqlar tələb edən detalları var. O vurğulayıb ki, Qətər və Misirin vasitəçiliyi ilə sənəd HƏMAS-a çatdırılıb və əsas məqsəd müharibənin dayandırılmasıdır; xüsusilə İsrail qüvvələrinin çıxarılması məsələsi əlavə müzakirə tələb edir. Baş nazir ümid edir ki, tərəflər plana konstruktiv yanaşacaq və fürsətdən istifadə olunacaq.
Mövzu ilə bağlı politoloq Elçin Xalidbəyli Crossmedia.az-a açıqlama verib: "Yaxın Şərqin yenidən dizayn olunması prosesinə məhz ABŞ liderlik edir. Regionda baş verən hadisələrin əsas hissəsi ABŞ-nin ssenariləri və dəstəyi ilə reallaşdırılır. İsrailin kütləvi insan tələfatı ilə nəticələnən hərbi əməliyyatlarının arxasında da məhz Vaşinqtonun dəstəyi dayanır".
Politoloq bildirib ki, son vaxtlar dünyada İsrailin qəddarlığına qarşı kütləvi etiraz dalğası güclənməkdədir: "Bu səbəbdən ABŞ istəməsə belə, proseslərə müdaxilə etmək məcburiyyətində qalır. Məhz buna görə də Prezident Donald Tramp Qəzza böhranının nizamlanması ilə bağlı yeni plan irəli sürüb. Bəzi məlumatlara görə, İsrail də bu plana razılıq verib".
Elçin Xalidbəyli qeyd edib ki, atəşkəsin əldə olunması və sülh sazişinin imzalanmasından sonra Qəzzada qurulacaq müvəqqəti hökumətə Böyük Britaniyanın sabiq baş naziri Toni Bler rəhbərlik edəcək: "Bu isə göstərir ki, Tramp Yaxın Şərqdə yaranmış qorxunc vəziyyəti idarə etmək üçün fərqli yollar axtarmağa məcburdur".
Politoloq vurğulayıb ki, beləliklə, mövcud situasiya həm ABŞ-nin ittiham olunmasına zəmin yaradır, həm də Ağ Evin Yaxın Şərq yükünü öz çiyinlərindən götürmək niyyətini ortaya qoyur: "Böyük ehtimalla, yaxın dövrdə Yaxın Şərq böhranı fərqli istiqamətlərə yönələcək və region sabitlik mərhələsinə qədəm qoya bilər".
Xumar Emilqızı
16:40 01.10.2025
Oxunuş sayı: 1666
