İsrail, Suriyanın parçalanmasını özünün əsas hədəfi kimi görür -AÇIQLAMA
Suriya ilə İsrail arasında aparılan danışıqlarda təhlükəsizlik razılaşmasının əldə olunması son anda baş tutmayıb. Tərəflər arasında müəyyən razılaşdırmalar olsa da, yekun anlaşmanın imzalanması mümkün olmayıb.
Mövzu ilə bağlı Crossmedia.az-a Ədalət, Hüquq, Demokratiya (ƏHD) Partiyası İdarə Heyətinin üzvü, politoloq Əli Zülfüqaroğlu açıqlama verib: "Türkiyə ilə İsrail arasında təhlükəsizlik sazişi, yaxud münasibətlərin normallaşması Netanyahunun hakimiyyətdə olduğu dövrdə qeyri-mümkündür. Çünki İsrailin hazırkı hökumətinin əsas məqsədi Suriya ərazilərinin işğalıdır. Bu səbəbdən də Suriyada güclü dövlətin mövcud olması İsrailin maraqlarına ziddir. İsrail, Suriyanın parçalanması və bir neçə istiqamətdə bölünməsini prioritet hədəf kimi görür".
Politoloq qeyd edib ki, bu məqsədlə İsrail müxtəlif vasitələrdən istifadə edir: "YPG və PYD kimi terror təşkilatlarını dəstəkləyərək bölgədə təsir imkanlarını artırır;
Druz icması üzərindən etnik qarşıdurma yaratmağa çalışır və onların hüquqlarını müdafiə adı altında bölgəyə müdaxilə etməyə zəmin hazırlayır;
“Davud dəhlizi” layihəsi ilə YPG və İsrail arasında birbaşa əlaqə qurmağa çalışır".
Əli Zülfüqaroğlu bildirib ki, beləliklə, Suriya ilə İsrail arasında münasibətlərin normallaşmasından söhbət belə gedə bilməz: "Netanyahunun hakimiyyətdə olduğu müddətdə İsrail Suriyaya qarşı daimi təhdid mənbəyi olaraq qalacaq və Suriyanın ərazi bütövlüyünü müxtəlif vasitələrlə sarsıtmağa davam edəcək".
"Əslində, İsrailin yalnız Suriya ilə deyil, həm də Livan, Fələstin və digər Yaxın Şərq ölkələri ilə münasibətləri gərgindir. Bunun kökündə İsrail hökumətinin sionist düşüncəyə əsaslanan siyasəti dayanır. Dünya ictimaiyyəti artıq bu siyasətin mahiyyətini açıq şəkildə görür. Sionizmin ifşa olunması İsrailin indiyədək əldə etdiyi uğurlu nəticələrin davamlı olmayacağını göstərir".
Həmçinin politoloq vurğulayıb ki, buna görə də beynəlxalq aləmdə İsrail hökumətinə qarşı təzyiqlərin, sanksiyaların artırılması, eləcə də Netanyahunun hakimiyyətdən getməsi istiqamətində səylər müşahidə olunur: "Yaxın Şərqdə sabitliyin bərqərar olması üçün başlıca şərt İsrail hökumətlərində sionist ideologiyanın hakim mövqedən çıxarılmasıdır. Əks halda, aparılan bütün danışıqlar nəticəsiz qalacaq".
Xumar Emilqızı
15:38 27.09.2025
Oxunuş sayı: 5237
