İran nüvə silahı hazırlamaq mərhələsindədir, ona görə də... - ŞƏRH
İran Prezidenti Məsud Pezeşkian Nyu-Yorkda BMT Baş Assambleyasının iclasında bəyan edib ki, ölkəsi nüvə silahı əldə etməyi qarşısına məqsəd qoymur.
O, çıxışında Yaxın Şərqdəki vəziyyətə və Ukrayna böhranına toxunub.
"İran uzun illərdir ki, Yaxın Şərqin kütləvi qırğın silahlarından azad olmasının tərəfdarı olub", - M.Pezeşkian bildirib.
O, həmçinin vurğulayıb ki, İran Ukrayna və Rusiyanın münaqişənin həlli üçün ədalətli razılaşma əldə edəcəyinə ümid edir.
İranın bir sıra dövlətlərlə münaqişə şəraitində olmasının səbəblərindən birincisi nüvə silahına malik olmaq arzusudur. Bu məsələ illərlə İran və ABŞ arasında da narazılığı gücləndirdi.
Pezeşkianın səsləndirdiyi fikirlər barədə Crossmedia.az-a danışan Orta Doğu Araşdırmalar Mərkəzinin sədri, politoloq Sədrəddin Soltan bildirib ki, 2013-cü ildə İranın ali dini rəhbəri Ayətullah Xomeneyi ölkəsinin nüvə silahı hazırlamayacağı, istehsal, tətbiq etməyəcəyi və yaynayacağına dair fətva verdi: "Bu məsələ İranın müdafiə doktrinasında da öz əksini tapıb. Pezeşkianın BMT baş assambleyasının 80-ci sessiyasında çıxışında bu məsələ yenidən səslənib. Prezident bütün dünyaya bəyan edib ki, ölkəsi nüvə silahı hazırlamayacaq. Əslində bu məsələ ABŞ-ni, İsraili və onların havadarlarının narahat edən məsələlərdəndir. İranla 12 günlük müharibənin də əsasında duran amil bu idi. İran nüvə silahı hazırlamaq və addım atmaq mərhələsindədir. Ona görə də onun nüvə obyektlərini sıradan çıxarmaq lazımdır. Ötən gün İranın ali dini rəhbəri Ayətullah Xomeneyi bəyan etdi ki, 60% Uran nüvəyə çevrilir. İran xarici işlər naziri Abbas Əraqçi bəyan edir ki, zənginləşdirilmiş uranları ABŞ-nin bombaladığı nüvə obyektlərinin altındadır. İran urandan silah hazırlamaq məqsədi ilə deyil, radioaktiv maddələrin tətbiqi ilə texnologiyanı inkişaf tdirmək istəyir. SEPAH və ona bağlı qurumlar çəkindiricilik məqsədi ilə nüvə və ona bənzər silahların əldə edilməsinin tərəfdarıdır. Pezeşkian başda olmaqla islahatçılar isə nüvə silahı əldə edilməməsi, kütləvi qırğın silahlarının yayılmaması üçün İranın üstünə düşən öhdəliyi yerinə yetirmək istəyir".
Ayhan
16:27 25.09.2025
Oxunuş sayı: 1204
